Ol ship owna i save ko long wan strike sapos i nokat klia infomesen long proses blong sevesem ol aelan.

Ship Owna mo semtaem Luganville Memba blong Palemen, Honoroble Matai Seremaiah, i talem se kavman i kat kasem April 25 blong letem pipol long ol aelan i save long proses we ol ship i stap folem long taem blong COVID.

“Bigfala jalenj naoia mifala i save folem proses ia be taem mifala i ko kasem aelan mifala i stak,” Mr Seremaiah i talem.

“Kavman hemi mas risosem ol agensi blong oli karem aot awenes long ol provins blong mekem se operation hemi save ko, otherwise mifala i nosave kohed blong kat hikups from fulap ship oli faenem se taem oli kasem ol aelan ba oli no akseptem olgeta even we mifala i bin folem ol rul bae mifala i mas kambak ale hemi kostem mifala.

“Sapos kavman hemi no mekem eni solution, mifala i nokat choice be disaed blong hangarem evri ship long 25 long manis ia. Hemia blong savem cost instead blong pem salari mo fuel ronron ko kam we hemi westem”

“Ating bai resolution blong ol ship owna blong Vanuatu, mo no ol Ni -Vanuatu ships owna be inkludum Vanuatu Ferry mo evriwan; mifala i kivim long kavman kasem 25 long manis ia blong oli mas sotem aot ol Standard Operating Procedure ia.”

“Proses ia hemi no tekem point blong olgeta we oli stap long field we olgeta nao bae i yusum i mekem se i kat sam jalenj.”

Acting Maritime Regulator, Kembro Manderson i talem se bae oli wok wetem ol Secretary General blong ol provins mo ol eria administa blong mekem moa awenes.

“Yumi tekem ol tingtng blong ol ship owna ba yumi mas mekem amendmen o jenis long hem blong insetem ol tingting blong olgeta insaed esepeseli handling blong ol cargo,” Mr Manderson i talem.

“Olsem long proses we hemi stap ia Kavman hemi putum aot we i kliarem sam ship long Vila be taem ship hemi kasem ol aelan oli stil putum ship lo 48 haoa kwarentin bageken.

“Standard Operating Procedure hemi wan rul nomo olsem yumi luk long Vanuatu Ferry taem hemi kambak wetem wan crew we hemi test positiv mo yumi kam antap wetem wan tingting bageken blong yumi mekem amendmen o jenis blong hem. Taem wan crew hemi test positive yumi putum aot hem then yumi kwarentinem ship ia ova night; yumi testem sapos hemi negative ship hemi sta ko, yumi mekem Rapid Antigen Test i wan mas.”

Mr Manderson i talem se evri ship we oli aot long Port Vila oli sabmitim ol plan blong olgeta mo stap 48 kwarentin.