Ova 30 Ni-Vanuatu seasonal woka long Recognised Seasonal Employer long Hastings oli muv i ko long ol jej mo storey bilding Libray long Napier, east coast blong New Zealand long wik ia folem flood blong Tropikol Saeklon Gabrielle.
Scott Elijah, Wan Ni Vanuatu RSE woka i talem se i kat ova 200 Pacific seasonal woka i muv mo hemi wan sad taem.
“Mifala i aot, mifala i kam long wan ples we mifala evri RSE woka blong Pacific i kam stap tugeta; Sapos yu luk raon long haos ia i kat ova 200 seasonal woka we mifala i kam tugeta; ol otoriti oli lukaotem mifala, oli provaedem kakae mo bedings,” Mr Elijah i talemaot.
“Ol donation i stap kam yet long wik ia. Ating long Sunday bae mifala i sepereit i kobak long ol ples we mifala i stap long hem. Long saed blong wok ating bae mifala i nosave wok long longterm blong vinisim ol kondrak folem situasen we i bin stap, ol apple evriwan oli flaot mbe tankiu long olgeta pipol bak long Vanuatu we oli save prea from mifala. Ol Ni-Vanuatu we oli stap long plesia oli sef.
“Hemi wan hard taem we mifala i ko tru long hem. Hemi no wan isi taem. God i blesem yufala.”
VBTC Nius i kasem toksave se sam woka oli slip long jej haos mo sam long Libray.
Seasonal woka, Malmeles Evena i sendem sam pikja i kam long VBTC Nius we i soem ples we oli stap silip long hem wota i fulap long hem.
Mr Evena i talem se plante woka ia i neva experiencem wan samting olsem ia.
Ol foto ia i soem ples blong slip mo kitchen i fulap long wota.
Country Liaison Officer (CLO) long New Zealand, Olivia Johnson i talem se ol Ni-Vanuatu woka long eria ia oli sef taem hemi mekem kontak wetem ol tim lida mo woka tru long fon kol, messenger mo fesbuk grup.
Labour i talem se Ms Johnson i bin letem olgeta long Labour Sending Unit i save se ol woka blong ol farm long eria ia i bin muv i ko long ol evacuation senta.
“Ol boss blong ol farm i stap wok hard naoia blong faenem ol spes blong ol woka we wota i kasem ol ples blong silip blong olgeta; Sam woka oli nosave kobak long wok sins long Thursday wik ia from klin ap i stap tekem ples long city,” Labour i talemaot.
I kat ripot se long saot blong New Zealand, 80% blong ol woka oli sef mo stap long ol sef ples blong silip mbe long Not, 20% oli afek long Saeklon Gabrielle long Hawks Bay mbe oli no kasem eni kil. Labour i talem se 35 woka long TSC Employer i lusum evri samting blong olgeta long flood.
Vanuatu High Commission wetem Ms Johnson oli stap wok wetem Ministry blong Business, Innovation and Employment (MBIE) long wan emergency response coordination.
Labour i talem se pawa long Hawks Bay i no on yet mo communication i stil wan jalenj blong toktok wetem ol famili.
I kat media ripot blong 12 missing RSE woka mbe Labour i talem se oli no blong Vanuatu mo ol famili memba i no sud fraet sapos oli nosave kasem ol famili blong olgeta long New Zealand.
Ol Ni-Vanuatu woka ia oli stap tugeta wetem ol woka blong Solomon Islands, Tuvalu, Samoa, Fiji mo Tonga.
