Sunday, April 14, 2024
28.8 C
Port-Vila
Sunday, April 14, 2024
More

    Ol komuniti i nidim gudfala rod long Bigbay Inland

    Bigbay Inland long Santo i kwestenem from wanem oli stap yusum semak rabis rod sins 1990s i kam.

    Taem VBTC Nius i kasem Anguro vilij, wan remote komuniti long Bigbay Inland, Jif Paul Garae i talem se oli gat seves blong helt mo skul be rod i nogud yet.

    Jif Garae i talem se long evri yia ol trak blong Bigbay eria 2 long bush oli pem ol pepa blong yusum pablik rod be from wanem i nogat gudfala rod?

    “Evri samting ia ol trak owna oli pem, mo mifala i save se kavman hemi blong nation ia,” Jif Garae i talem.

    Taem wan man i sik long ren taem bae hemi fesem ia nao, samtaem yumi save ko putum i stap long klinic be bae hemi mas ded long klinic ia nao from trak bae hemi no save pikimap hem i ko long bigfala hospital from riva i ron mo ol rod long hil trak i ron lem nomo long sun taem be taem ren i ren bigwan ples i klis.

    “Mifala i stap sava long rod amas yia vinis. Ating bifo mifala i karem copra i ko kasem long kros rod hemi samples ova 40 kilomita,” Jif Garae i talem.

    “Be stat long taem ia long 1981 kasem 1982, mifala i luk se i gud from mifala i gat gudfala laef, rod hemi gud. Be stat long 1990 kam ia rod i nogud nao olsem kavman i no lukluk long rod nomo be bigfala samting we mifala i mekem olsem salem kava mo copra o buluk, hemi stap katem aot plante tax long hem long market sale.

    “Mifala i pem trak we i stap long Bigbay bush be hao kam kavman i no lukluk long rod blong mifala? Mifala I stap fesem plante problem long rod ia nao.”

    Eria blong Bigbay Inland i gat tu bigfala riva we ol lokol i mas krosem blong kasem Luganville, wan hemi Lape mo narawan hemi Jordan riva.

    Wan mama blong Nawelala long eria blong Bigbay Inland, Maco Tawewas, i talem se oli travel blong kasem Luganville hemi fo (4) haoa.

    “Ol rod we mifala i stap travel long hem ia hemi olsem blong Nani be hemia ol nara ples olsem saot bae gud yet be Bigbay hemia ol nara draeva i nosave ko lem, ol man Bigbay nomo oli stap ron long trak long ol rod ia,” Mrs Tawewas i talem.

    “Mifala i vote koko be mifala i no luk wan samting nomo aot long hem. Ating hemi stap lukluk long ol nara ples be Bigbay hemia Kavman blong yumi i fogetem gud.

    “Hemia mifala i stap kami a hemia mifala i stap salem laef blong mifala wantaem ia sipos mifala i foldaon olsem pa mifala i save ded.

    “Taem mifala i kam hemia mifala i pem trak i sas ia, hemi VT30,000 o VT20,000 ale taem mifala i kam maket i nogud olsem ia hemia mifala i pem trak nomo, mifala i nosave tekem wan mani from longwe tumas praes blong trak i sas.

    “Taem mifala no mekem mani olsem mifala i traem blong mekem kava blong salem be taem praes i nogud mifala mas faenem wan wei nomo blong winim mani blong givhan long ol pikinini.”

    Long rispon, Publik Woks long Luganville i talem se bae oli wokem rod long Sara kasem long Lape junction long nekis manis, Novemba.

    Oli talem se oli nogat mani blong fixim rod ia be bae oli traem best blong wokem gud rod.

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen