Ol hae presa long West mo East blong New Zealand i mekem Tropikol Saeklon Judy, Category 2 i slo blong muv i kam daon long ol aelan blong Vanuatu.
Duty Weta Forecaster Patterson Malsale i talemaot long VBTC Nius long tete moning.
“Tropikol Saeklon Judy hemi stap naoia long Not mo i stap long Category 2; System i stap antap ia yet from ol hae presa i stap daon, i kat wan long West mo East blong New Zealand. Ol hae presa ia nao ia i mekem hae presa i stap antap ia yet, ol rij oli push i kam, nara wan i kam tuwods Queensland wetem New Caledonia mo nara wan i push i kam ia kolosap long Fiji ia,” Mr Malsale i talemaot.
“Naoia we yumi stap toktok system ia i stap muv long 3 knots we i minim se hemi muv slo. Yumi wet sapos wan long ol hae presa ia i muv lelbet, model i soem se long east saed ia bae i rilis lelbet i muv i ko long feta east bae i mekem saeklon ia i save muv i kam daon.
“Ol hae presa ia nao ol H ia, hemia ia nao i mekem system i stap yet antap. Solwota antap ia hemi kat plante energy we i mekem heat, once hemi kam daon ia bae saeklon ia i ko long Category 3. Forecast trak i soem se saeklon bae i folem ol aelan i kam daon, hemia nao green line long chart ia. So ol klaod aktiviti i save develop taem hemi stap raon antap ia mekem se hemi save ko strong moa.
“Hemia we naoia i stap ia, yumi prediktim se bae i kasem yumi long category 3. Naoia we i stap yu luk long pikja ia, eye blong saeklon i stap difren ples mo ol klaod long difren ples, i stap plante nao antap long Not. Hemia nao yumi kat gud weta mbe yumi long Not wind wind i pik ap lelbet. Mbe taem hemi muv i kam daon bae yumi tekem wind, ren, mo tu ol glae fos wind bae yumi stat filim ia nao. ”
Vanuatu Meteo i talem se woning blong hevi ren, wind mo marine woning long solwota.
Long Not, ol lokol long Motalava aelan, Banks Grup i talem se wind i stat blong pik ap mo i strong.
Lates apdeit long tete eli moning, Weta Ofis i talem se Tropikol Saeklon Judy category 2 i stap long 12.6 degri saot 168.5 degri East. Tropical Saeklon Judy i position long senta blong square leta 1, namba 3 long Vanuatu Tropical Cyclone Tracking Map. Hemia hemi 175 kilomita noteast blong Vanualava mo 285kilomita not blong Maewo. Long pas 3 haoa, Tropical saeklon Judy i stap muv long wan saot direksen blong 6km/haoa(3 knots).
