Ol founding papa blong Independens i soem las rispek long leit foma Santo Memba blong Palemen long Palemen haos long eli wik ia.
Palemen blong Vanuatu hemi flae haf wei long Tuesday ia blong soem rispek long leit Sela Molisa , wan MP sins 1982 kasem 2012.
Fes Presiden blong Republic blong Vanuatu, George Sokomanu, i talem se leit Molisa hemi wan long ol lida we i faet from fridom blong Vanuatu.
“Fridom blong Vanuatu oli no givim long wan silva plate; mo yu(leit Molisa) hemi wan long ol lida we i faet from independens blong kaontri.” Mr Sokomanu i talem.
Mr Sokomanu i talem se Independens blong Vanuatu ol lida ia i faet from.
Nara founding papa, Barack Sope Ma’autamate i talem se kavman long taem ia i yusum leit Molisa long sam denja aktiviti blong helpem kaontri.
“Yumitu i stanap strong, hemi no sef from yumi kasem sam eria we ol rebel oli stap long hem, be yumi tu wok tugeta blong fight from independens; Tete yu ko, mi stap, heart blong mi i soa,” Mr Sope i talemaot.
Foma Memba blong Palemen blong Pentecost mo foma Prime Minista, Charlot Salwai Tabimasmas, i talem tankiu long wok blong leit Molisa long finans.
“Olsem wan long taem minista blong Finance, legacy we yu putum olsem economic road map long Finance, yumi stap folem yet tete,” Mr Tabimasmas i talem.
Vincent Bulekon, Fes foma lida blong Opposition, Vincent Bulekon, i talem se leit Molisa hemi wan strong lida.
“Yu olsem wan pila blong democracy long Vanuatu mo yu leko mifala ol pikinini be bae ol gudfala wok bambae mifala i tinkbaot oltaem,” Mr Vincent Bulekon i talem.
Leit Molisa hemi born long 1950 mo hemi kat 72 yia.
Hemi blong Wunpuko long Bigbay, Santo.
Hemi Born 1950 mo Body blong hem iko long rest long namba 21 long Manis ia wetem wan age blong 72.
Foma steit minista Sethy Regenvanu mo Paul Telulukluk i pat long grup we oli ko pem las rispek long kolik blong olgeta.
Long tete moning Presiden blong Vanuatu His Excellency Nikenike Vurobaravu, wetem Fes ledi, Kea teka Praem Minista mo ol kea teka minista i bin pem las rispek tu.
Ol jif long kaontri tu oli pat long tete blong soem heart blong olgeta long wok blong Leit Molisa.
