Wan eviksen hemi tekem ples long Etas eria start Tusdei moning.
VBTC nius i stap long Etas eria long Efate taem i lukim buldoza emi pusum aot ol laslas half blong ol bilding mo ol karen we ol viktim oli bin leko i stap.
Notis blong warent i kasem ol pipol ia tu wiks i pas.
Long Tusdei taem buldoz emi pusum eria, i lukim i kat presens blong Vanuatu Polis Fos wetem Sherif.
Warent ia i kam nomo afta we i kat tri famili oli winim graon ia long Kot.
VBTC Nius i witnisim tu Tusdei moning se ol famili we oli bin viktim long warent ia oli leko ples sam deis i pass vinis.
Sam pipol we oli no wantem kam aot long media oli resem plante komplen se why i kat tumas eviksen oda or warent we I lukim pipol lusum propeti blong olketa.
Oli askem ol otoriti konsen mo espesiali ol manples blong tokbaot isue blong graon naoia from plante pipol i kam ol viktim mo especiali ol pikinini.
Eviksen warent long Etas Tusdei moning hemi hapen long graon we I karem tri lishol taetol.
Ol lisol taetol i kat blong 12/0921/146, 12/0921/147 mo 12/0921/148.
VBTC Nius emi karem infomesen tu se handing ova blong legal lishol taetol long trifala stret man blong graon i hapen tede.
Sherif mo Vanuatu Polis Fos oli mekem wan strong apil i ko long pipol klosap long eria se oli nomo kat raet blong go insaet long graon.
Oli konfemen tu se eni trespas afta long handing ova blong graon mbae i save kat arest we polis mbae emi mekem mo oli save jajem kes ia olsem wan criminal trespases andanit long law.
