Sam fama blong Malekula mo Ambrym oli faenem i had blong winim vatu blong skul fi blong pikinini blong olgeta i kobak long skul tete.

Hemi lates infomesen we VBTC Nius i karem we Eria Administrata blong Saot East Malekula, Joselito Atptun hemi talemaot folem damej blong Saeklon Lola we i mekem long ol kokonat mo kava long 2023, ol fama long Malampa provins oli nosave salem gud kakai mo winim mane.

‘’Sam oli stat blong mekem smol maket be hemi no wan bigfala maket; sam oli brekem cabij o tekem ol fruits oli save ko selsel long hem o sam bae oli save ko long solwota blong salem sam fish from plante kokonat mo kava oli damej,’’ Mr Joselito hemi talemoat.

Wan Copra fama blong Dickson Rif, Juneo Kaipapa i talemaot se hemi had we had naoia from saeklon i damejem plante kokonat.

‘’Ol kokonat hemia ol broke wantaem long stampa, mo bae I tekem faev kasem six yia blong oli gro bakegen sipos yumi planem bak,’’ Mr Kaipapa i talem.

Copra fama long Sessivi West Ambrym, Dona Massing i talem semak toktok.

‘’Mifala i mekem mani long copra mo kava nomo be naoia mifala i faenem i hard smol from saeklon Lola i mekem bigfala damej,’’ Mr Massing i talem.

Kava Fama long Lawa, Edison Kalsi long Saot West Malekula i talem se ol pikinini blong hem i no ko long skul yet.

Mr Kalsi hemi gat tu pikinini, wan hemi skul long Tata Secondary Skul long Saot Santo mo nara wan long Rensarie College long Malekula.

‘’Saeklon I damejem fulap kava long karen mo sam long ol kava ia oli sting evriwan from i gogat ples blong salem tu,’’ hemi talem.

‘’I gat sam garen fama we Saeklon i no damejem ol karen kava be fulap hemia saeklon i damejem evriwan.’’

Long rispon, PEO blong Malampa, Renjo Samuel hemi talem se oli no karem yet wan instraksen long kavman blong karemoat fi long ol skul pikinini we disasta i afektem olgeta mo oli stap wet yet sipos i gat wan disisen bae oli save act folem.