Likon komuniti long North Ambrym i kat niu projek blong produsum hai kwaliti copra.
Eria Administrata blong Not Ambrym, Jackson Willie, i talem long taem blong lonj i no longtaem se premium copra dryer i wan ajivmen blong ol lokol fama.
Mr Willie i talem se hemia i wan stat long komuniti mo i kat bigfala tinktink yet blong projek ia sapos oli wantaem mekem wan factory.
Lonjing seremoni ia i kavremap tri mein projek, premium copra dryer, maket blong jakol blong sel kokonas mo wan produsa koperativ we hemi karem nem Suali.
Minista blong Climate Change mo semtaem Memba blong Palamen blong Not Ambrym, Honorabol Bruno Leignkone nao hemi i bin openem projek ia.
“Taem yumi stap tokbaot copra yumi stap tajem majoriti blong 70 per cen blong populasen we oli laef long rurol eria, ” Minista Leingkone i talem.
“Copra hemi bin mein comoditi, we hemi draevem yumi aot long colonial pawa mo kam long Independens. Fulap kaontri long pasifik tete oli kolem kokonas olsem tri blong laef.”
Pilot project blong premium dry copra ia i owem sakses blong hem long olketa woman. Community blong Likon i kat just ova 20 household mo ol woman long community ia i manej blong actionem bigfala tingting ia we naoia i stap olsem fes kaen model olsem blong ol fama long ol eria kolosap i save kam luk .
Lonjing seremoni ia i riflektem interest blong ol fama blong copra.
