Palimen hemi confemem seh hemi no risivim eni mosen yet nomata long ol toktok long ol politisen seh i gat plan i stap blong jensem Gavman.
Folem nomol proces, palimen bae hemi mas rijistarem wan mosen weh oli saenem blong bae hemi save kam efektif.
Stat long las wiken finis VBTC Nius i kasem infomesen seh i gat nekosiesen bitwin sam pati long oposisen mo sam long Gavman blong fomem wan niu Gavman.
Beh tete aftenun, Presiden blong Rural Divelopmen Pati (RDP), MP Jay Ngwele i talem long VBTC Nius seh i nogat eni mosen yet.
RDP nao hemi karem posisen blong lida blong oposisen naoia mo semtaem hemi komantem haes namba blong ol memba insaed long Parliamen.
VBTC Nius hemi kasem rilaeabol infomesen tu seh i stap gat nekosiesen yet blong traem karem inaf namba blong lojem wan mosen.
Nomata long hemia, Akting Praem Minista, Matai Seremaiah hemi bin talemaot long wan Pres konfrens yestedei seh ol toktok blong mosen ia i no gat eni tret long Gavman.
Nomata weh i gat toktok seh sam pati insaed long Gavman tu oli pat blong ol nekosiesen ia, Minista Seremaiah hemi talem seh hemi bin mit wetem ol memba blong koalisen mo save konfemem seh Gavman hemi solit yet.
VBTC Nius hemi traem beh i no save kasem toktok blong ol nara lida blong ol nara pati weh oli involv long ol nekosiesen ia.