Sunday, April 14, 2024
28.8 C
Port-Vila
Sunday, April 14, 2024
More

    No ristriksen long muvmen-State blong Emergency

    I nogat eni ristriksen long muvmen blong pipol folem state blong Emergency.

    Minista blong Climate Change, Ralph Regenvanu i talem se State blong Emergency ia hemi blong Saeklon.

    “Bae i nogat eni ristriksen long muvmen blong travel o eni tink from hemi no COVID;So bae yumi no expektem blong i kat eni ristriksen long muvmen blong pipol,” Mr Regenvanu i talem.

    “Fes oda hemi blong Tropikol Saeklon Judy we State blong Emergency i sud stat long March 2 long provins blong Tafea, Shefa, Paama mo Ambrym, Penama mo Merelava long Banks grup; Afta Seken State blong Emergency yumi amendem(mekem jenis) mo hemia i kam long efek folem impak blong Tropikol Saeklon Kevin mo long March 5 nao yumi extendem disasta zone blong i kavremap evri provins; So ful Vanuatu naoia i stap long disasta zone mo i aplae long ful Vanuatu. So anda long disasta risk management act, taem yu diklarem wan State blong Emergency olsem i minim nomo se nating i jens long graon. Mo sapos mi olsem Minista blong Climate Change mi saenem wan oda blong direktem wan ofis blong kavman blong mekem wan samting, ofis ia i mas mekem from oda blong minista ia i ovaraetem eni nara loa konsenem wanem nao kavman dipatmen ia o eni organisation i save mekem. So kasem steij blong naoia i nogat eni oda i isu,

    “Hemia hemi State blong Emergency blong wan saeklon; wan natural hazard. Mi wantem se yumi fogetem ol tinktink blong COVID from fulap man i stap konfus se i kat ristriksen long plen, i nogat eni ristriksen long travel o social gathering olsem jej o sports; night club i save open o restaurant, ol aktiviti ia i ko hed nomo. Ristriksen bae i stap long damej nomo. So evritink i nomol nomo naoia. Mbe long steij naoia i nogat eni oda we i gazette.

    Mr Regenvanu i talem se kavman bae i ko hed blong rispon mo mekem asesmen.

    “Ol asesmen tim i stap ko aot blong faenem aot wanem ol damej mo nid blong pipol mo long en blong wik bae yumi save wanem ol plan blong rispon,” Mr Regenvanu i talemaot.

    “Fes asisten i ko vinis, ol tarpaulen mo wota i stap ko.

    “Folem loa we i stap, taem we kavman i no pasem budget long stat blong yia, kavman i save ko hed blong spendem mani beis long badget blong pas yia. So kavman i save ko hed blong spendem mani blong 2022 until en blong March. Sapos kavman i no pasem wan budget long en blong March, kavman bae i nosave spendem mani long fes blong April i ko. So hemia nao i impoten blong pasem budget.”

    State blong Emergency ia bae i stap long six manis.

     

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen