Sunday, May 19, 2024
29.8 C
Port-Vila
Sunday, May 19, 2024
More

    No netwok mo rod-Not West Tanauta

    Not West Tanauta i wantem kasem seves blong netwok mo rod blong helpem laef blong ol pipol long rimot eria ia i moa isi.

    Local Noel Arem long Hebron Vilij i talem long VBTC Nius se i kat wan vodafone tower antap long hil long Not Tanna mbe oli no kasem netwok nomo.

    “Mifala i dipen bigwan long Radio Vanuatu blong kasem infomesen; Hemi onli sos blong communication mo ples we mifala i tekem infomesen long hem,”Mr Arem i talem.

    “Mifala i stap long laef blong bifo kasem naoia yet, mifala i talem tankiu long wan staff long VBTC we i stap wetem mifala tete blong mifala i save talemaot konsen ia. Kavman i se seves hemi blong pipol; mifala nao i votem ol lida blong ko long Palemen so witaot pipol i nogat elek lida long Palemen so netwok blong vodafone mo digicel i mas kat.

    “Rod i bin stop no kasem mifala yet, mifala i kat Janis blong katem rod long hand pawa, ol apu yusum canoe blong pul kasem long lenakel, samtaem ded rod, banana bot mbe mas kasem hospital from hemi wan wei, samtaem mifala stap ko mama bonem bebe.  Mifala i spendem 10,000 bot, sikman nogat mani.

    “Yumi talem se yumi 40 yia long independens long 2020 mbe mifala long Not west Tanna i no kasem yet 40 yia ia, seves we mifala i nidim i no kasem mifala yet so plis kavman i lukluk long ol rimot eria blong Vanuatu.”

    Acting Manager blong Tafea Public Works Dipatmen, Rodger Komie, i talem se bae hemi wan sas exercise blong mekem gud rod long Not West Tanauta.

    Not Tanna inland mo Not east coastal bai i wan urgent request blo lukluk long hem.

    “Not west Tanauta i kat wan akses mbe naoia i no possibol from wan crucial section mekem ful akses i block mbe sam eria i mas akses nomo long bot from landscape i had blo kondraktem wan rod,” Mr Komie i talem.

    “Bae hemi wan bigfala wok we bae i nidim wan bigfala mani from i kat fulap creek we bae i nidim sam smol bridge o culvert mo bakegen hemia i bitim budget blong Tafea finis ia nao. Bai yumi brekem daon long phase, phase 1 hemi katem daon ol hil mo kliarem rod mo phase 2 hemi kondraksen blong ol crossing. Hemi wan sas exercise.

    Mr Komie i talem se hemi no save givim stret amaon blong vatu blong mekem rod long Not West Tanauta.

    “Nogat from sapos mi kivim bai hemi no akuret from asesmen ia blong long taem finis,” Mr Komie i talem. ‘Not Tanna inland mo Not east coastal bai i wan urgent rikwes blong lukluk long hem tu.”

    VBTC Nius i andastan se netwok coverage i wan problem long fulap rimot eria long Vanuatu folem landscape blong sam eria we i mekem se i hard mo hemi kasem infomesen se ol technician blong Vodafone i stap wok had long ol aelan naoia blong mekem gud netwok.

     

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen