I nokat wan klia plan blong wokem gud ol drainage long Port Vila mo Luganville.

Wetem plan blong openem boda long international travela long July, i gat konsen abaot flood taem ren i ren.

Long en blong May, Port Vila International Airport runway i fulap long wota i mekem se Air Vanuatu i mas saspendem ol domestik mo international flaet.

Kwesten long pua drainage system mo rod hemi stap longtaem se wetaem bae hemia i fix taem ol turis i stap kambak.

Wan lokol long Switi eria long Port Vila, Douglas Tamara i talem se bigfala ren ia, wota i fulap long drainage long airport mo i afektem pipol from wota i ko insaed long ol haos.

Hemi askem ol otoriti blong mas impruvum ol drainage.

Memba blong Palemen blong Santo Rural, Alfred Maoh i bin askem kwesten long ol pothole long Luganville.

Efektiv long July 1, ol foreign air operata bae oli statem bak ol flaet i kam long Vanuatu.

Minista blong Infrastructure mo Public Utilities, Jay Ngwele, i anaonsem long Fes Ordinary Session blong Palemen long en blong May.

“Mi wandem adem nomo se 1st blong July we bae ol boda i open, Director blong Civil Aviation Authority hemi karem sam sabmisen long sam foreign air operata blong oli resume reschedule flaet blong mekem seves i kam long Vanuatu we hemia i kat Fiji airways, Fiji Link, Aircalin, Virgin Australia, Air Niugini, Solomon Airlines, mo sam oli even wantem mekem direk flaet i kam long Santo, so hemia hemi gud nius blong haos tete,” Minista Ngwele i talem.

“July priperesen i ko hed mo yes bae yumi kat ol flaet i kam in.”

Public Relation Ofisa blong Ministry blong Infrastructure mo Public Utilities, Antoine Malsungai i rispon blong talem se i kat plan i stap blong ripea rod.

Hemi talem se i kat ol longterm plan blong mekem ol niu plan blong fixim drainage.

Mr Malsungai i talem se ol wok ia bae i nosave hapen kwiktaem olsem mo i nidim taem mo mani.

Weta ofis i givim woning blong mo ren long June kasem August.