Commissioner blong Labour i askem pipol blong no fraet o tink negativ long sik ia Omicron mbe tekem stik blong no sik bigwan.
Murielle Metsan Meltenoven i bin kasem Omicron tru long hasband blong hem taem hemi bin kat kondak wetem fes COVID kes. Mrs Meltenoven i talem se hasband blong hem i bin kasem virus ia taem hemi bin stap karemaot ol nomol wok blong hem olsem wan Senior Nurse long Emergency mo Accident Wod long Vila Central Hospital.
Mrs Meltenoven i talem se pipol i no tink se omicron i kam blong kilim ded man mbe tekem stik blong COVID.
“Ol fes tri dei, mitufala i stragol, mi fo wan mi fil weak, mbe hasban blong mi i stanap strong,” Mrs Meltenoven i talem.
“Mi filim sotnes blong breathe, hed hevi, joint pain long hand mo bak wetem feva. Feva blong Malaria blong Dengue Feva hemi strong moa bitim blong omicron mbe i dipen long imune system blong wan man.
“Tritmen we mitufala i bin tekem taem mitufala i stap aot mitufala nomo, hemi drink plante hot wota evri 20 mins wetem lemon, ginger, honey, garlic mo tekem tu ol natural remedi olsem lif pawpaw, korosol, ol famili oli boldm mo tekem i kam mo mi tink se hemia nao i save help blong mitufala i rikava ariap.
“Mitufala i steam tu taem long wan dei long moning mo aftanun. Mo tu katem ol onion putum long evri window long haos mo letem oli open blong air i kam insaed. Mo wan i stap long rum blong hem mo nara wan long rum blong hem. Mitufala i klinim haos tu taem long wan dei blong mekem sua nomo se virus i no liv insaed long haos.
“Mo taem blong mop mi yusum hot wota wetem ginger, garlic mi boilem, mo yusum ol sop blong mop blong klinim aos. ”
Mrs Meltenoven i talem se tufala i kakae plante vitamin C olsem red pamplemus mo orange, plante aelan kakae.
“Sapos wan man i kasem sik ia , samtaem bae hemi nosave smelem save taste blong kakae mbe hemi mas kakae blong faetem sik ia,” Mrs Meltenoven i talem.
“So wanem mitufala i mekem long haos taem mitufala i kobak test long namba six dei, risal hemi negativ. ” Yu we yu tekem stik yu no wari tumas from bae yu sef.
Mrs Meltenoven i kol blong pipol i no spoilem nara man taem hemi kasem Omicron.
“Eni wan we yu save se i stap talem nogud wan nara man, hemi help blong kriatem wan nara mental isu we i save afektem laef mo bae hemi fil se hemi nomo pat long society,”
“Ating experience blong mi ia nao mi wantem serem mo plis yu no fraet. Stik nomo i save protektem famili.
“Omicron i olsem wan nomol flu mo taem yu kasem mo bae i save help blong faetem wan nara sik.”
Mrs Meltenoven i talem se ol pikinini i bin ko liv wetem ol famili taem tufala i stap long isolation.
