Niufala Vanuatu Police Station Projek hemi setem wan niufala benchmark blong recycling mo environmen sustainability insaed long sekta blong Konstraksen long Vanuatu.
Wetem help blong kavman blong Australia, projek ia hemi aim blong daonem impact weh bae hemi save gat long environmen tru long fasin blong recycling mo waste management. Ol fes wok blong projek ia long eria blong George Pompidou hemi blong brekem daon ol haus long site ia, klinim ples, mo preparem ground redi blong konstraksen hemi stat.
Tingting blong recycle mo waste management hemi from konstraksen hemi wan mein sekta weh i stap spolem environment truaot long wol. Long taem blong demolisem, fulap waste olsem concrete, vegetation, metal, mo bricks oli stap endap long ol landfills olsem Etas.
Polis i talemaot seh ova long period blong 13 wiks, oli brekemdaon 3 haus long site ia mo oli karemaot 244 ful trak, weh hemi ova 4,000 tons blong ol pat blong ol building weh oli brekemdaon. Antap long hemia, oli tekemaot ova 50 tonnes blong vegetation waste mo 800 tonnes blong steel.
Ol concrete mo bricks blong ol haus weh oli brekemdaon bae oli yusum bakegen long future konstraksen mo oli sendem ol wire weh oli karemaot igo long recycle. Ol organic waste olsem wud, grass, mo lif oli processem i kam olsem compost mo fertiliser.
Maneja blong projek site, Jarryd Allan, hemi talem se oli bilif se projek ia bae hemi save setem precedent blong ol future konstraksen projek long kaontri.
Nekis stage blong projek ia hemi blong statem wok blong konstraksen blong niufala Vanuatu Polis Station weh bae hemi wan nara bigfala developmen long Vanuatu Polis Fos.
