Wan niu bakery i open long Blackman town, Tanna long wik ia wetem eim blong bakem ova 2000 bread long wan dei.

Sherley Pata wife blong Pita Pata wan lo tufala brata we oli ol owna blong Taste Life bakery and butcher i talem se fes trial blong bread i stat long wik ia wetem ol niu masin.

Mrs Pata i talem se ova long past tu dei we oli bin statem trial operation blong olgeta,  praes blong bread hemi VT70 be luluk i stap se long taem blong lonj blong bisnis long Novemba bae praes i ko long VT80.

Hemi talem se bakery hemi produsum kolosap 1200 bread lo wan dei, be oli faenem se hemi no enaf blong mitim demand blong ol man.

“Mifala i tekem ol baker long Vila blong oli kam down long Tanna blong mifala i statem fes trial,” Mrs Pata i talemaot.

“Naoia we hemi stap mifala i trial long bread nomo. Mifala i stap tingting finis blong mekm gato mo croissant.

“Mbe naoia mifala i stap bakem bread nomo mo bae mifala i provaedem hot coffee tu blong pipol oli kam pem bread mo drink hot coffee.

Mrs Pata i talem se oli save tekem take away tu.

Hemi talem se i kat plan blong karem wan bus blong dropem ol bread long ol skul mo maket.

“Tingting blong statem wan bakery long Tanna hemi bin kam up from se mifala karem wan graon lo subdivision ale disaed blong bildim wan bilding,”

“Mifala i disaed se yumi traem lukluk wan difren bisnis. Mifala i kamap wetem tingting blong bakery.

Lonj blong niu bakery ia bae i stap long Novemba 9.

By trainee journalist, Adonnai Varahu.