Niu ship blong Vanuatu Ferry Limited, Vanuatu Ferry 2 bae i kasem kaontri long wik ia.
Reliable Sos i konfemem long VBTC Nius mo talem se hemi dipen nao long weta.
Long April ia, Vanuatu Chamber blong Commerce mo Industry i anaonsem fes bisnis client blong niu Emergency Employment Visa we hemi Vanuatu Ferry Limited. Mo visa ia hemi blong posisen blong Superintendent Fleet Captain blong bigfala ship ia we wok blong hem, hemi masta blong evri captain blong organisem bak kampani mo help putum in ples ol safety mesa blong ol ship.
Long en blong March kavman i bin mekem wan oda from blong tekem in ol pipol aotsaed long kaontri we oli kat moa experience blong helpem Vanuatu folem Labour Shortej long sam long ol bigfala posisien.
Superintendent Fleet Captain hemi blong New Zealand mo hemi kat ova 40 yia experience long ol international wota.
Reliable Sos i talem se ship ia hemi wan long ol bigfala ship we i bigwan bitim Vanuatu Ferry.
“Mifala blong talem stret se mifala i shot long ol kwalifae staff from plante oli ko wok ovasi; Superintendent Fleet Captain i agri blong stap wetem mifala blong 1 yia; Ship ia bae i mekem seves long ol aelan,” Reliable Sos i talem.
Mbe wetem posisen ia plante man oli konsen se ating hemi wan wok we wan Ni-Vanuatu nomo i save mekem.
Maritime College long Luganville, Santo i talem se posisen blong Superintendent Fleet Captain hemi wan hae level blong kasem.
Spokesperson we i toktok i talem se Vanuatu i nogat wan captain we i kwalifae blong kasem posisen. Hemi talem se ol course long Maritime, hemi kasem nomo level blong 500 gross.
“Sapos yumi tekem enaf sapot long investmen blong kat ol fasiliti mo kat ol hae level instrata blong tijim course ia long College bae yumi save kasem nomo, “Hemi talem.
“Ol ship olsem Vanuatu Ferry o Cargo wetem niu wan we bae i kam in oli ol bigfala ship so i rikwarem blong i mas kat ol captain long posisen ia. Olgeta we yumi trenem olgeta long course plante oli tren mo oli kwalifae mo oli stap wok naoia long ol smol ship we olgeta tu i stap sevesem ol aelan blong yumi ia. Mbe sapos yumi kasem enaf sapot bae yumi save ko kasem hae level ia course blong Maritime captain ia we hemi 700 gross.”
Posisen blong Superintendent Fleet Captain i stap hae antap mo chief captain mo enginia i kam anda long hem.
