Niu tourism visa oda bae i saen long wik ia blong alaoem ol turis i stap long Vanuatu blong fo manis.
Director blong Vanuatu Immigration Services, Jeffrey Markson i talemaot long wan Media Press Conferens tete folem plan blong boda opening long July.
“Long pas yumi stap isuem wanem yumi stap kolem visita visa mo hemi blong 30 dei; Man hemi kam in blong 30 dei be wetem opening blong boda, yumi luk tourism industry blong yumi hemi foldaon bigwan mo dipatmen i luk se hemi kat wan wok blong help so yumi kat wan spesific visa naoia we hemi blong ol turis,” Mr Markson i talem.
“Mo insaed long criteria blong turis visa ia, bambae wan turis hemi kam in bae hemi nomo stap blong 30 dei olsem long pas be bae 120 dei we hemi fo manis. Hemia i minim se long fo manis ia, hemi kat opotuniti blong ko long ol aelan blong yumi.
“Visa ia hemi prioriti mo Minista blong Internal Affairs i sud saenem oda blong hem samtaem long wik ia mo bae i kam efektiv. So ol kolik blong mifala long tourism bambae i stat maketem visa ia long eni pipol we i wantem kam in olsem wan turis we i kat ol difren criteria i stap.”
“Wan nara tinktink we yumi arem abaot tourism industry blong yumi hemi ol skil wokman oli muv aot long kaontri mo pat long Labour Mobility, so taem yumi inkrisim stay blong ol turis, yumi wantem luk benefit tru long oda we bae i saen blong tekem on bod hotel industry blong isu spesel categori visa i ko long wokman. Olgeta i save tekem ol foreign wokman i kam in anda long ol posisen blong manaja. So bambae fo manis ia i stat long July 1 kasem October. So instens, sapos Le lagoon hemi luk se hemi nidim tri manaja be ol lokol ni-Vanuatu i stap ovasi, taem ia nao bae hemi mekem aplikesen blong hem, i sabmitim i ko tru long wan screening komiti we Labour, Tourism mo Immigration i stap insaed long hem mo yumi save isuem we bae i stap blong wan yia.
“Yumi mekem hemia tu long tinktink se sapos Le Lagoon i stap tekem ol niu intake blong hem be bambae hemi wan opotuniti blong trening. Afta long wan yia bambae disisen i stap long managemen weta oli wantem meintenem o putum hem i kobak. Sapos oli wantem menten be oli mas transferem hem i ko long Employment Visa nao.”
“Hemia blong help bringim moa turis i kam long kaontri.”
