Bae i kat wan niu inkris praes blong plastik napi long stoa afta we Palamen pasem wan amendmen blong Impot Duties Act blong protektem enviromen blong yumi.

Men pepos blong Kavman i pasem hemi blong sapotem helt mo haegene blong ol bebe mo blong adresem enviromen isu long kantri tudei.

Niu inkris ret blong praes blong plastik napi hemi from 0% to 5% long evri stoa.

Minista blong Klaemet Jenjs, Ralph Regenvanu hemi talem se wan wei blong protektem enviromen hemi blong inkrisim import duty tax so bae ol pipol bae oli cut daon blong pem plastik napi mo bae oli pem ol reusable one.

“So yumi mekem ol stadi, mo yumi finem se ol disposable diapers nao hemi men samting we stap fulumap Etas naoia bitim evri nara item,” hemi talem.

Hemi talem moa se hemi impoten blong ol pipol i mas sakem toti long stret ples blem, mo i kat fulap plastik napi ol man stap sakem long solwota mo semak taem lan fil long Etas tu hemi fulap naoia.

Long kaen situasen olsem hemi gud blong finem ol nara wei blong mekem laef hemi isi mo wan long ol solution ia Mamma’s Laef Foundation hemi stap providem long saed blong produsum ol resuable calico napkin blong pikinini, blong olfala mo ol pipol wetem disabiliti tu.

“Mifala mekem blong helpem ol mama blong oli sevem mani blong olgeta, nara samting hemi blong yumi bildim ekonomi blong Vanuatu sapos oli sapotem ol lokol,” hemi talem.

“Mo blong kipim enviromen hemi klin from taem ol mama oli usum ol disposable ones, oli sakem olboat mo dog i pulum, i mekem fly i ko tajem, ale i ko tajem kakai ale yu kat sik, i kat big impak long enviromen saed blem, i polutem ples tumas.”

Owna blong Mamma’s Laef foundation, Mary Kalsrap hemi talem se ol reusable calico napi we oli stap mekem hemi sef, hemi isi blong usum mo putum long wan pikinini blong werem mo no mata se hemi had blong wasem bae hemi save kipim enviromen hemi klin oltaem.

Wan mama, Melinda Raymond hemi serem konsen blem tu se longtaem i kam ol mama oli usum plante ol calico napkin blong jenjem bebe, mo ol plastik napi hemi wan niu samting we jes kam nomo.

“Yumi we yumi stap long aos hemia hemi gud long yumi from taem hemi usum long naet olsem long morning yumi kerap mo wasem aot wantaem mo hangem,” Mrs Raymond i talem.

“Napi olsem hemi gud long taem yumi wokbaot nomo, olsem hemi isi wan we pikinini mekem rabis ko long hem mo hemi isi blong yumi karem aot long taon from I long wei long aos.”

Wan yangfala papa, Ramtion Daniel hemi serem tingting blem se hemi gud evri wan mas folem tingting blong Kavman blong kipim ples i klin.

“Tudei yumi pas raon long nicefala ples blong yumi luk toti i fulap so hemi gud blong yumi mas redusem plastik blong yumi i ko daon afta yumi usum ol natural samting we yumi kat,” hemi talem.

Bill blong Import Duties tax oli bin gazettem long eli long yia ia blong ol bisnis opereta oli stat usum.