Kavman bae i saenem niu oda tete anda long State blong Emergency.
Minista blong Climate Change, Ralph Regenvanu i talemaot long Vanuatu Post Cyclone Special Coverage long tete moning.
Hemi talem se National Disaster Commmittee i bin mit long Wednesday mo kamap wetem niu oda ia.
“Bambae wan oda i kamaot blong talem se tabu blong kilim ol native pidgin mo flying fox from yumi luk fulap kiling ia i stap ko hed; Ol man oli stap kilim olgeta from i nomo kat tri blong hang long hem; Mo mi tinkbaot long Tropikol Saeklon Pam, yumi givim semak kaen oda olsem ia,” Mr Regenvanu i talem.
“Ating awenes i mas ko long ol pipol se hemi no taem blong kilim ol pidgin. Oda ia hemi no kavremap sako(invasive species) mo man i save ko hed blong kilim. Mbe taem oda ia i kamaot polis i save arestem yu.
“Nara wan we oli tokbaot se bae i kat dedicate relief folem asesmen, bambae i mas kat tu kontrol blong Polis mo National Disaster Managemet Ofis long hao ol relief i ko aot from i kat potential blong abuse, man we i strong i karem moa mo man we i weak, i tekem smol. So bae i kat sam oda tu blong kontrolem distribution blong relief blong mekem se i share fair folem nid. Mo hemia tu bae i wan oda we National Disaster Commmittee i apruvum.
“Long taem blong crisis ia fulap man i no glad long spid blong rispons, oli no glad long sharing blong relief saplae mo hemi wan taem we plante man i wari from yumi stap long wan taem we i stresful. Fulap man oli lusum evrisamting olsem garen mo oli nosave se bae oli mekem wanem. Mo i kat bigfala posibiliti blong i save kat faet. So hemi impoten blong kavman i traem best blong manejem hao yumi givim relief mo rispon long wei we yumi luksave se fulap man i kat konsen. So hemia nao disisen ia i kamaot. Hemia i no blong talem se yumi trastem ol distributa long graon mbe long en blong dei bambae fika i point i kambak long kavman sapos i kat wan samting i rong. So hemi wan mesa we yumi inples jes blong yumi glad long ol rispon we i stap ko aot.
Minista Regenvanu i talem se Climate Change Ministry i stap traem blong wok blong kat ol Community Disaster Committes(CDC) raon long evri aelan blong Vanuatu.
“So naoia yumi stap long phase blong wan projek blong neks six yia blong kat ol Community Disaster Committes i fulap long ol eria blong Vanuatu from anda long Disaster Risk Management Act, olgeta nao i sud mekem asesmen mo oli kontrolem distribution blong relief mbe from system ia i no fuli inples mo tu communication i hard so kavman i ko hed blong kam insaed mo pat long hemia,” Mr Regenvanu i talemaot.
“So long ol yia we i kam olsem pat blong impruvum resilience blong yumi. So kam antap long level komuniti kam long ol eria administrator mo kam antap long Provins. Yumi hop tu se bambae i kam moa strong blong taem blong saeklon bae i nomo kat problem olsem bakegen.”
Minista Regenvanu i mekem i klia bageken se i nogat eni ristriken long muvmen blong pipol.
