Wan Memba blong Palemen i talem se Vanuatu i mas awea long ol risks blong niufala wok program blong wok mo live long Australia.
John Salong, i askem ol komuniti blong toktok moa abaot niu Pacific Engagement Wok visa Program ia.
ABC Nius i ripotem se program ia i fokas long ol Melanesian kaontri we Mr Salong i se bae i alao blong 3,000 visa evri yia blong ol lokol i travel.
“Plante fama oli talem se ol wokman blong yumi i ko, oli trustworthy, oli save hao blong opereitem farm machinary, ol routin blong plant mo hao blong manejem ol farm; So ol kaen man olsem nao oli pruvum olgeta se bae oli pat blong tekem wife mo pikinini i save ko wok mo skul. So sapos ova i stret be bae i kat sam isu, bae ol famili i se oli ko ia bae oli nomo kambak ia. Bae hemi ko ol famili long Vanuatu sapos wan i sik be bae i nogat wan blong lukaotem o sapos i ded be yumi nara wan i mas berem, bae yumi mestem language long ol pikinini we oli gro i kam antap, graon blong kambak lem bae i wan isu mo mani we oli winim longwe bae i nomo helpem ekonomi,” Mr Salong i talem.
Mr Salong i talem se Vanuatu i nogat history blong migrate mo live ovasi from nomoli ol wokman i travel blong ova faev manis o tri yia nomo mo kambak.
“Vanuatu i lid long ol wokman long Seasonal Workers Program mo Pacific Labour Scheme long Australia mo mi sua se bae hemi lid long niu visa ia sapos hemi redi, so 3000 man i ko wan yia, so sapos 1500 ni-vanuatu i leko kaontri wan yia, olsem wan nation o komuniti yumi save manejem so yumi nid blong mekem diskasen mo plan,” Mr Salong i talem.
“Evri taem wan man i ko bae i kam wan opotuniti mo i kam wan risk. I gud blong sendem sam pipol nomo i ko blong kriatem opotuniti long Australia espeseli ol aelan olsem Tanna, Ambae, Ambrym mo ol nara wan we i stap experiencem ol volcanic aktiviti.
“Wan komuniti i save toktok se amas man ia i ko ale sam oli pat long ol nara program we oli ko wok mo kambak.”
Mr Salong i talem se Out migration i hapen plante long ol Polynesian mo Micronesian kaontri longtaem i pas.
“Guam i kat akses ko Hawaii mo i muv i ko long United States; Tonga mo Samoa oli muv ko liv long New Zealand, Australia mo United States,” Mr Salong i talemaot.
Long eli June, Niu Foreign Affairs Minista Penny Wong i bin travel i ko long Samoa mo anaonsem niu visa blong ol Pacific Islander i wok mo kam permanent residen long Australia.
Australian High Commissioner, Heidi Bootel i talem se hemi wan impoten reform folem longfala period blong COVID.
Wan kola i talem se sapos loa jens, bae i ripitim bak history blong blackbirding we plante oli stateless naoia.
Mbe Mr Salong i se Vanuatu i kat dual citizenship we bae oli save kambak mbe ol isu blong graon mo language bae i wan jalenj.
