National Green Energy Fund (NGEF), anda long Ministri blong Klaemet Jens, bai hemi help blong givim mani from sam pos laet blong rod long Efate.
Bai hemi olgeta sola pos laet long ol rod we i nogat laet long hem.
Hemia afta plante yia we pipol long Port Vila ino fil sef blong wokbaot long naet, folem plante eria we i tutak nomo.
Wetem hemia plante pipol i pointem finga nao long Unelco, olsem bigfala kampani blong laet long Port Vila.
Manejing Daerekta blong kampani, Frederic Petit, i mekem i klia long pablik se Unelco i lukluk nomo blong saplaem laet long Port Vila.
“Unelco i no moa in-charge long pablik lighting long Port Vila Municipality mo raon lo Port Vila,” Mr Petit i talem.
“Concession we Unelco i gat, concession blo laet i tokbaot lo pawa generesen mo distribution. Mekem pawa, produsum pawa, distributum i golo ol eria lo Efate aelan.
“Lo past yes, mifala i stap operetem pablik lighting, be i kasem lo wan taem we outstanding i gro bigwan, mo decision maker lo Vanuatu i talem se no, ino save gohed olsem.”
Port Vila Municipal Council we i lukluk long ol strit laet long olgeta eria konsen, i talem se oli gat wan miting wetem Unelco ino longtaem, blong lukluk long ol dak eria.
Kaonsel i talem se patnasip ya emi blong adresem sefty blong ol lokol mo ol visita long taon.
Maneja blong NGEF, Georgewin Garae, i talem se oli stap wok wetem minispol kaonsel naoia blong putum ol sola laet long rod.
Hemi talem se long en blong wik ia, bai oli traem aot tri laet we i tu saplaea long Port Vila i givim.
“Bambai oli hangemap (putum) trifala ya, mo bai yumi luk. Spos we hemi gud ale bai yumi mekem wan ful submission we Port Vila (minispol kaonsel) hemi askem, we hemi araon 200 strit laet blo stat,” Mr Garae i talem.
Hemi talem tu se Shefa Provinsol Kavman i bin kam fowod blong putumbak ol sola pos laet long ol eria blong hem, we saeklon i bin damejem.
“Shefa Provins (Provinsol Gavman) hemi kamap wetem wan prokej, oli kolem ‘Let There Be Light Project’. Hemi sola strit laet,” Mr Garae i talem.
“Oli successfully submitim wan proposol i kam lo NGEF. Bod i bin lukluk lem mo oli apruvum.
“Igat 81 streetlight evriwan. Oli bin taketem tri eria blo ol surburbs blong Port Vila, we emi (includum) Beverly Hills, Bladiniere Estates mo Blacksands.”
NGEF olsem wan agensi we givim mani i stap helpem ol otoriti blong mitim taket plan blong renewable eneji long yia 2030, mo blong adresem ol problem blong klaemet jens.
