Nasenol Disasta Management Ofis i plan blong mekem wan fly-ova asesmen long tete, Tasde, espeseli long olgeta aelan blong Penama provins. Sapos hemi possibol bae plane i save land long Longana Airpot long Ambae or Lonorore long Pentecost.
VBTC hemi kasem infomesen se igat wan emergensi Council blong olgeta Minista miting hemi hapen long Wenisdei blong lukluk ol immediate respons we Gavman bae hemi mekem.
I gat indikesen se olgeta intenasenol traditional patna oli istandby blong mekem fes asesmen mo deployem fes rilif saplae soon we weta hemi alowem.
Sevelens flaet long tete bae Praem Minista, Hon Chalot Salwai i stap long hem.
Ol alert long Malampa mo Shefa oli karemaot tete moning.
Olgeta smolsmol infomesen nomo istap kam insaed naoia long olgeta damej we Tropikol Saeklon Lola i mekem long olgeta aelan long north blong kauntri.
Ol fes foto we i kamaot long provins long Torba, Penama, Malampa mo Sanma i soem ol bigfala damej long olgeta hom, skul building, mo karen.
Long aelan blong Pentecost, Albert Bule we hemi wan tija i talem se smol asesmen we oli mekem long Ranwadi Churches of Christ Kolej i soem se damej ia i moa bitim Tropikol Saeklon Harold we i pas long provins ia long 2020.
“Win i kasem mifala long samples 8 oklok kasem 1 oklok olsem. Hemi stap longtaem mo damej blong hem we mifala i luk, hemi moa bigwan bitim Harold. Igat staff haos iko daon, sam klasrum iko daon. Igat domatori blong ol boys,” Mr Bule i talem.
“Olgeta student i oraet. inogat wan i kasem kil. Mi wantem asurem ol parens se ol studen mo ol staff oli oraet. Oli silip long ol haus we i sef istap. Mifala i luk bae igat bigfala wok bae i done bagegen.
“Hemia wanem we mifala i save talem abaot skul. Mbe long vilij mifala ino save infomesen yet. Bae mifala i givim moa infomesen afta we mifala i wokabaot long ol vilij.”
Mr Bule hemi iusim VSAT system we skul ia hemi gat olsem onli communikesen sistem naoia.
Vodafon mo Digicel i confirm se sistem blong tufala i daon long ful not blong kauntri.
CEO blong Vodafone, Thomas Bruce, i talem se bae oli wok long system ia taem weta hemi klia.
Semtaem hemi se Vodafone hemi stap traem blong securim ius blong wan helikopta blong putum bak netwok blong hem.
Long aeland blong Ambae, igat bigfala damej long tufala bigfala skul long aelan ia.
Long St. Patrick Kolej i lukim samples 13 building we i smolsmol damej long hem, mbe sam domatori i damej wetem ol ruf i aot.
Ambaebulu Junior Secondari Skul hemi lukim tu double klasrum ino gat ruf naoia.
Mein road we hemi linkim Longana, East Ambae mo South Ambae i blok wetem ol stone we raf solwota hemi sakem ikam andap long rod.
