Nasonal Waste Wota Task Fos oli mit tudei blong adresem isu blong toti wota we i kamoat long Vila Central Hospital mo hemi stap spolem wota blong Erakor Lagoon.
Ofis blong State Law i bin advisem Depatmen blong Wota mo Resos blong oli nosave givim wan penalti mo direktif notis long Ministri blong Helt from nomo se Kavman ino save penalisem Kavman bakeken.
Wota Kwaliti Ofisa blong Depatmen blong Wota mo Resos (DOWR), George Matariki we hemi pat long Task Fos ia hemi talem se wei fowod naoia hemi blong ol Depatmen anda long Nasonal Waste Wota Task Fos oli wok tugeta mo fixim isu blong toti wota long namba 2 lagoon.
“Kavman bae ino save ko akensem Kavman, yumi mas traem kivim ol rekomendesen nomo mo wok tugeta blong solvem isu we i stap,” hemi talem.
Nasonal Waste Wota Task i bin stat long 2019 afta we Kavman hemi putum wan ban long Port Vila Habor blong stopem ol pipol blong swim mo pulum fis.
Mr Matariki i talem se Task Fos ia oli mekem blong adresem hae inkris blong toti mo bacteria o pepet long solwota.
“Ol aktifiti o wok blong mifala hemi blong mekem ol inspeksen long ol eria we raonem Port Vila harbor stat long Chantilly’s kasem Ifira, mo blong putum wan penalti lo eni man o bisnis aos we brekem ban ia.”
Hemi talem se long yia 2019 kasem 2020, Nasonal Task Fos hemi wok blong putum penalti long ol bisnis aos we oli stap leko toti wota o sewage blong olgeta i ron kamaot long Port Vila Habor.
“Ino ol bisnis aos nomo beh olgeta aos blong ol pipol we silip long eria kolosap long coastal wota ia, yumi mas jekem gud hao nao toti blong toilet blong olgeta i pas ko wea mo yumi jekem tu sapos oli kat propa sewage control mo ino lik kolo solwota.”
Tim oli wok folem Act we givim pawa long Depatmen blong Wota blo putum aot ol direktif notis we ol bisnis aos oli mas folem sosno oli save tekem olgeta kolo Kot mo stopem bisnis blong olgeta.
“Yumi givim tu ol rekomendesen long olgeta blong oli mas fixim ap ol isu we stap ko akensem environment sefti mo yumi kivim wan time period long olgeta oli mas folem sapos no mifala putum long Kot mo bae oli pem wan faen blong VT5 milien.”
Mr Matariki hemi talem se Task Fos hemi strong blong olgeta traem solvem isu blong sewage ia long yia ia nomo.
Ministri blong helt i konfem bakeken se i gat ol wok i gohed finis sins we oli bin lukim nid blong solvem system blong sewage blong Hospital.
Acting Direkta Generol blong Ministri blong Helt, Posikai Samuel i talem long VBTC News se olgeta i stap toktok wetem wan contractor long mata ia.
Mr Posikai i talem seh ministri i stap targetem manis blong May long yia ia blong ful renovasen blong sewage system i sud finis.
Nasonal Waste Wota Task Fos ia hemi kat ol diferen memba long Depatmen blong Environmen, Depatmen blong Wota mo Resos, Public Helt, Port Vila Municipal Council, SHEFA Provincial Ofis, Ports mo Habor, UNELCO mo Depatmen blong Public Works.
