Ol international patna i providem plante rilif saplae mo sapot long Vanuatu afta Tropikol Saeklon Lola.
Long las wik mo wikend, Australia, New Zealand, France mo United States blong America i mekem flaet blong lukluk long damej blong saeklon.
Long wikend, Australia hemi providem ol fes lod blong rilif saplae i kasem Vanuatu.
Wan plen blong Royal Australian Airforce hemi karem ol samting olsem tabolin mo ol hygiene kit ikam long kauntri.
Olgeta item ia, Australian High Commission long Vanuatu, hemi handem ova iko long National Disasta Management Office.
Gavman blong Australia i anaonsem se bae i help festaem, wetem wan money we i kasem AUD$800,000 we hemi samples 62.5 million vatu.
Minista blong Intenasenol Developmen mo Pasifik, Hon Pat Conroy i talem se money ia hemi blong helpem Vanuatu wetem ol imediate respons long TC Lola.
Hemi talem se naoia tu Austalia, hemi stap wok kolosap wetem Gavman blong Solomon Island blong faenemaot olgeta nid blong pipol blong hem tu from Saeklon ia hemi afektem olgeta befo hemi kam long Vanuatu.
Long Solomon Aelan, saeklon i afektem olgeta long Temotu provins.
Ova VT62.5 million we Australia bae i givim hemi blong sapotem tu Australian Humanitarian Partnership, wetem ol mein NGO blong Australia, blong oli providem impoten help iko long olgeta communiti we saeklon i kilim olgeta.
Australia hemi stap wok wetem Frans mo New Zealand tru long Asosiesen we oli singaotem FRANZ.
Minista blong Foren Afea, Penny Wong i talem se tingting blong mifala istap wetem pipol we i stap long ol comuniti we Tropikol Saeklon Lola i afektem.
Hemi talem se long Vanuatu, hemia i namba 3 tropikol saeklon we oli experiensem long yia ia mo long taem olsem ia, pipol mo ol Gavman blong Pasifik oli save rely long Australia olsem memba blong Pasifik famili blong sapotem respons blong olgeta.
Minista Pat Conroy i talem se Australia hemi praod blong gat wan longstanding patna long Pasifik long ol time olsem ia.
Hemi talem se Australia i save se hemi impoten blong muv hariap blong helpem ol patna blong respon mo daonem ol longterm impact, mo se Australia i wok wetem ol patna tu olsem Australian Partnership mo FRANZ arenjmen blong mekem suo se igat gudfala coodinesen efot blong delivarem sapot iko long olgeta we i rili nidim help.
Long Sandae, helikopta blong France i karem teknikol tim blong ekwipmen blong helpem fixemap komunicasen netwok long Ambae mo Pentecost.
Long Mandae, New Zealand hemi karem 13,000 kilogram blong saplae i kam long Vanuatu.
Saplae ia hemi includem shelta kit, hygiene kits, kontaina blong wota, jenso mo jenarator.
Two pipol blong New Zealand Defence Force hemi kam long Vanuatu blong assistem blong planning mo logistics.
