Saturday, May 18, 2024
25.8 C
Port-Vila
Saturday, May 18, 2024
More

    Nangol tourism aktiviti i mas ko hed

    Saot Pentecost i wantem Nangol o land diving tourism aktiviti i opereit bakegen from i givim vatu long ol lokol.

    2020 hemi makem las taem we ol turis oli tekem pat long nangol aktiviti long Saot Pentecost.

    Naoia we boda hemi open bageken, ol jif mo ol pipol blong Saot Pentecost oli stap toktok raon blong putum bak nangol aktiviti

    Eria Administa long Saot Pentecost, John Bani i talemaot.

    “Yia ia yumi wantem putum bak nangol aktiviti from hemi wan bigfala inkam. Long Saot Pentecost taem turis hemi kam, yumi kat ol boat landing fi we yumi pem i ko long council, ol mama vendor mo tu ol pikinini blong ol school oli involv blong tokbaot kalja blong olgeta long ol turis. wan long ol main inkam hemi fi blong entrens blong ko insaet long nangol o long nara ples blong turis,” Mr Bani i talem.

    “Wetem hemia, komuniti blong Wotafol long Saot West Pentecost, i stap luk fowod blong mekem developmen long saet blong Wotafol afta we Minista blong Climate Change i bin mekem wan kraon breaking blong Sola-hydro pawa projek.”

    Mr Bani i talem se projek ia bae i save givim laet mo pawa i ko long ol komuniti along long coast blong oli save yusum opotuniti ia blong save mekem gud ol bangalow blong mekem ol turis mo ol lokol oli harem gud.

    Tourism Sector i talem se long yia ia bae oli wok klosap wetm ol jif mo ol pipol blong Pentecost blong tekem bak turism bisnis i ko bak long aelan.

    “Taem yumi arem ol niufala infrastrakja olsem Sola-hydro projek, bae hemi helpem tugeta komuniti mbe tu long saet blong investmen blong kavman mo long private sekta long saed blong hao yumi save developem aelan blong Pentecost blong i save atraktem international visita. Sam long ol wok we mifala i stap karem aot naioa wetem patnaship we mifala i kat wetem Tourism Dipatmen, Ministry blong Infrastructure mo Public Utilities mo ol nara ministry, yumi stap lukluk long investmen opotuniti. Taem ol infrastrakja projek ia hemi stret mo hao yumi atraktem ol investmen opotuniti blong kam long aelan blong Pentecost we yumi stap yusum sam long ol turis atraksen blong aelan olsem wotafol mo nangol mo tu kastom blong ol man Pentecost,” Paul Pio, Marketing Ofisa blong Vanuatu Tourism i talemaot.

    Saot West Pentecost i stap luk fowod from ol developmen ia.

    by Patience Mawa.

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen