Gavman bae hemi mas pem Memba blong Parliament Christopher Emelee VT 2.5 million from inquiri we wan Parliamentary Committee i bin kontaktem mo putum aot long sosol midia.
Jif Jastis, Vincent Lunabek hemi rul long feva blong Torres Constituency MP ia afta weh hemi faenemaot seh inquiri ia wan Parliamentary Committee nomo hemi mekem beh hemi no wan stret Public Accounts Committee.
Committee ia hemi bin mekem inquiri ia from ol alekesen concernem Tuna Fishing (Vanuatu) Co, Limited weh MP ia hemi bin darekta blong hem.
Jajmen ia i talemaot seh investikesen weh komiti ia hemi bin mekem long Septemba, Oktoba, mo Novemba 2019 hemi no folem constitution mo i mekem seh sam confidential information oli no bin folem stret rod i go long ol journalis mo kamaot long midia.
Long taem ia i gat wan ristrening oda i stap weh i blokem ol niuspepa mo ol nara midia blong mo mas putum aot ol infomesen blong investikesen ia.
Kot i harem se Public Accounts Committee hemi gohed blong mekem investikesen blong putum aot long sosol midia nomata long ristrening oda ia.
Kaonsel blong MP Emelee i jalensem apointmen blong Pablik Account Committee ia we wan foma Deputi Lida blong Oposisen i apointem.
Kot hemi rul seh apointmen ia hemi no bin folem loa from parliamen nao hemi sut mekem stret apointmen.
Mr Emelee hemi klem seh investikesen ia hem from politikol risen blong spolem nem blong hem from taem ia i gat wan eleksen i stap kam antap.
Jif Jastis hemi rul long feva blong Emelee weh hemi klem seh ol aksen blong komiti ia hemi iligal mo oli no bin karem eni valid apointmen.
Hemi talem seh i nid blong i mas gat compensesen i go long MP Emelee from hemi soem seh i gat serious infringemen long raet blong hem weh loa i providem.
