Wan Memba blong Palamen blong Tanna Constituency i sakem aot ol toktok we ol pipol blong Torba Provins i mekem se hemi ko stap tok agensem vaksin.

Andrew Napuat i kliarem se hemi bin ko long wan mission blong jej long Gaua, mo wan jif i bin wokbaot ko luk hem long airpot blong storian smol long saed blong vaksin.

Jif ia i askem sam kwesten folem ol video we hem mo Memba blong Palemen blong Ambrym, John Salong i stap storian abaot COVID vaksin long hem.

“Long taem mifala i lan long airpot nomo, i kat wan jif i kam askem long mi blong save toktok smol long wanem i stap hapen long national kavman long saed blong COVID vaccination from mifala i stap konfus long plesia,” Mr Napuat i talem.

“So mi explenem long olgeta wanem we i bin hapen long Palemen, fastaem Palemen i tru hemi bin pasem Idemnity blong alaoem COVID vaccine i kam long Vanuatu. Nao taem mifala i bin ko, Palemen i bin talemaot se vaccine hemi no wan mas blong tekem mo oli no save fosem pipol blong tekem from hemi mas folem ful konsen blong pipol sapos oli akri blong tekem.

“Hemia nao hemi wanem mi bin talem long taem blong awenes long airpot. Mo mi bin askem long olgeta eni wan we i wantem tekem video, i save tekem blong korektem ol toktok blong rod we i stap ko raon we bambae oli save labelem akensem mi o kaen olsem ia.

“Afta we mi toktok long olgeta long airpot, oli talem long mi se hemia i no wanem we i stap hapen long plesia. Naoia oli kam stap fosem mifala mo tretenem mifala se mas tekem vaccine sapos no bae mifala i no ko long Sola, Vanualava blong tekem health seves. Mo sapos no bae mifala i no ko long ol health dispensari long Gaua blong tekem panadol o ol nara meresin afta mi talem se no hemia i rong.”

Torba Public Health Manager Henry Wetul i talem se hemi no bin stap long Gaua long taem ia, mbe wan nurse nao i letem hem i save long ol toktok ia.

Mr Wetul i talem se wetem storian blong Mr Napuat ia i mekem se ol pipol i fraet blong tekem vaksin.

Mbe Mr Napuat i talem se hemi no talem eni samting we hemi agensem vaksin mbe hemi storian long wanem nomo we oli bin talem long Palamen. Hemi talem se hemi no wan religious bilif from hemi tekem ol nara stik blong sik taem hemi smol.

VBTC Nius i kasem toksave long ol otoriti long Torba se bae oli sitaon nekis wik blong tokbaot mata ia.