Mosen blong nokat tras agensem Praem Minista Hon. Charlot Salwai bae i iko long Palemen long Wednesde nekis wik.
Motion ia bae hemi tekem 7 dei afta we oli saenem mo dipositim long Palemen.
Yestede Tusdei namba 7 Novemba mosen ia i bin diposit araon 5 oklok aftenun.
Moa bae Palemen bae i sitaon long Wednesde namba 15 long 2 oklok long aftenun long Namba 6 ekstra odinari siting blong Palemen blong lukluk long motion ia.
Spika blong Palemen, Hon. Simeon Seule i ofisali summonem namba six ekstra odinari sitting long Palemen.
Long ofisal publication blong ol samting insaed long motion ia i lukim 29 signiture everiwan we i sapotem mosen ia we hemi includim Presiden blong Union blong Moderate Pati, Hon. Ishmael Kalsakau Maaukoro.
Mo i kat 4 stampa rison insaed long mosen ia we ol MP ia ol putum agensem Hon. Salwai.
Ol MP oli klem se i gat gross mismanagemen blong Air Vanuatu.
Namba 2 rison i claim se Hon. Salwai hemi appointem wan current MP, Christopher Emelee, olsem wan minista be hemi stap fesem serious korapsen alegesen mo skandel.
Namba 3 rison hemi claim se Hon. Salwai hemi no wan propa or fit candidate blong holem ofis blong Praem Minista.
Mo namba 4 hemi claim se Hon. Salwai hemi no save pefomem duti blong hem olsem praem minista taem hemi no attendem Pacific aelan forum long wik ia.
Long namba 6 Extraodineri siting long nekis wik ol agenda we i stap inplace blong diskasem i kat 4 everiwan.
Fes 1 hemi removal blong Hon. Salwai olsem praem minista.
Namba 2 hemi revokesen blong suspensen blong Memba blong Malekula konstituensi, Hon. Gracia Shadrak.
Namba 3 hemi removal mo elekesen blong ol niufala deputi spika blong Palemen.
Mo namba 4 hemi removum mo appointem ol niufala standing komiti blong Palemen.
VBTC i traem blong kasem wan komen long Praem Minista be PRO blong Gavmen i talem se Praem Minista bae ino save toktok iet wetem media.
Long saed blong disolution, VBTC i karem infomesen long wan sos insaed long Gavman se bae i kat high posisbiliti blong wan disolusen i save tekem ples leit long wik ia.
Hemi bae i mas pass long Counsel blong olgeta Minista festaem.
VBTC hemi save se long tedei aftenun tu, olgeta politikol pati we i fomem Gavman oli bin mit.
Minista blog Klaemet Jenis, Hon. Ralph Regenvano, i stap lo Cook Island blong Pacific Islands Forum long wik ia. Hemi toktok wetem media long Wednesde moning. Hemi talem se hemi sori tumas blo wanem i hapen long politiks long Vanuatu naoia.
“Ol pipol oli tired lo instabiliti, oli tired lo mifala politicians blong mifala no save putum public interest festaem and publik interest, hemi stability,” Hon. Regenvano i talem.
“Instabiliti hemi spolem gud evri wok blo gavman, hemi spolem fasen we iven ol wokman blo gavman oli save wok blo ajivim fulap prokram we i nidim blong rolemaot”
Hon. Regenvano ise hemi hop colleagues blong hem, oli save faenem rod blo holdem taet gavman, blong i continue lo work blong hem.
“Mi mi appeal long ol lida blo politiks lo Vanuatu blo yumi putum pipol fes, yumi ting about stabiliti olsem mein samting were yumi nidim nao blo achievem fulap ol wok we i nid blo mekem.”
