Vanuatu Christian Council i kol blong moa prijing long Tabu spirit(Holy Spirt).
Jeaman blong Vanuatu Christian Council, Pastor Collin Keleb i talemaot toktok ia tete long South Malekula Mountain Witness Closing Declaration mo Thanksgiving Program long Independens Park, Port Vila.
“Mi askem ol pastor blong Vanuatu Christian Council blong tijim ol man abaot wok blong tabu spirit,” Mr Keleb i talem.
“I kat sam kwesten we Media i stap askem se stand blong council olsem wanem long grup we i stap prea ? mi talem toktok ia nao se sapos yu nosave man ia tabu spirit bae yumitu no askem isu ia from bae i kat konfliksen. So plis tijim ol man Vanuatu long man ia tabu spirit, laef blong hem, ministry mo fasin blong hem.”
Elder Bernard Kampai i anaonsem 34,503 alej black magic long Efate we oli kolektem.
“Yumi mas invaetem God i kam, hemi rul mo faet,” Mr Kampai i talemaot.
“Mi wantem blong God i tekem bak ples blong hem insaed long heart blong yumi fastaem mo ol samting bae i kam long oda.”
Elder Kampai i talem se fast, prea mo ridim toktok blong Bigman i mas kam feswan long laef.
Presiden blong Republic blong Vanuatu, His Excellency, Nikenike Vurobaravu i ofisiali diklarem Efate i kobak long Hae God tete.
His Excellency, Nikenike Vurobaravu i talem se ol nara aelan i sud luk exempol blong Efate mo askem ol ol evangelist ia blong ko prea long aelan blong olgeta.
Hemi talem tankiu long wok blong prea blong tekem pipol i putum bak faith long Bigman.
“Goal blong Council hemi blong mekem sua se evri jej oli unite tugeta blong presevem mo protektem integrity blong nation ia olsem wan christian nation,” Pastor Keleb i talemaot.
“Hemi stand tu blong mekem sua se evri ministry we oli stap mekem wok oli mas prijim kingdom blong Master Jesus Christ. Hemia blong mekem tok blong God i availabol long evri kona long laef blong yumi.
“Bae council i stanap behaed mo sapotem evri difren ministri we oli givim taem blong ko aotsaed mo ko hed prijim gospel. Kontinu singaot, wonem mo instraktem ol man blong liv mo sevem nation ia olsem Long God yumi stanap. Mi wantem talem tankiu long Kavman we i sapotem ol jej tru long ol mani. Mo ol mani ia mifala i stap kivim bak i ko long ol jej tru long fund mo wan long ol olgeta nao hemi blong ko raon mo evangelisem sosaeti. Mo mi talem tankiu long Hae God from diklaresen blong dei tete we Presiden blong Vanuatu, His Excellency, Nikenike Vurobaravu hemi bin diklarem.”
Saot Malekula Mountain Witness Evangelist i statem wok long Efate aelan long Novemba 18-Decemba 18 ia.
