Vila Central Hospital hem i rikodem araon faev bebe we oli bon long wan shift blong wan mid-wife, long wan dei.
Health Ofisa long Department blong Health Information System long Vila Central Hospital, Nego Alwin, i talem se rate blong tinej preknensi i ko antap long pas yia i kam.
Hem i talem se long statistic we Vila Central Hospital i rikodem, i soem se long yia 2014, wan totol blong 333 tinej kel oli bonem bebe.
Hem i talem se mo long 2015, Vila Central Hospital i rikodem wan totol blong 360 tinej kel we oli bonem bebe.
Long yia 2016, 346 yangfala gel oli bonem bebe. Long 2017, wan totol blong 367 yang kel oli bonem bebe.
Long 2018 i lukim wan drop long namba blong tinej pregnancy we 340 gel oli bonem bebe.
Long 2019, wan totol blong 192 oli bonem bebe.
Mr Alwin i talem se hem ia hem i rikod blong Vila Central Hospital nomo mbe i no includum blong ol difren hospital o helt senta long kaontri.
Hem i talem se i gat wan drop long 2019 from maybe i bin stap gat plante aweanes we helt i stap putumaot mo ol yang kel long Port Vila, i kam blong andastanem mo folem wanem ministri blong helt i stap talem.
Hemi talem se rikod blong 2020 i no kamaot yet.
Youth Officer long Vanuatu Family Health, Wamilly Massing, hem i bin atendem wan Reprodaktif Helt Woksop i no long taem i pas, i talem se hem ia hem i wan hae rate tumas.
Hem i talem se from risen ia woksop ia i kam in blong tijim ol yut blong oli kobak long ol komuniti blong olketa mo talemaot long ol nara yangfala we oli nokat janis blong lanem wanem oli kam blong lanem.
Wan Peer Educator, Presica Kalu, i talem se hemi glad from afta long woksop bae hemi save kobak long komuniti mo help kivim aweanes long ol nara yangfala blong help daonem isiu blong tinej pregnensi.
Hemi enkarejem ol yangfala blong no kat sex long eli age.
“Ol yangfala i mas wet kasem taem bodi i majua gud mo redi blong kat sex from long wei ia, i save helpem wan yang mama blong i no kasem kansa tu,” Ms Kalu i talem.
“Long plante rural eria, ol yangfala oli no skul gud mo hemi wok blong mifala nao blong helpem olketa.”
Director blong Youth Challenge, Noel Steven, i talem se taem wan yangfala i bonem bebe long yang age blong hem, i kat plante komplikesen we hem i save fesem.
“Hemi save putum laef blong hem long risk from hemi bonem bebe long wan eli age. Mo sapos hemi stap skul, bae isiu ia i afektem skul blong hem tu. Hem ia i save lid i ko long unemploimen, from yangfala i no save flatem gud skul mo nosave faenem wan wok.
“Unemploymen rate hemi wan bigfala isiu long Vanuatu mo sapos ol yangfala i kontinu blong stap ko long semak daereksen ia, bae i had blong yumi bildim Vanuatu.
“From yumi nokat ol graduate mo plante bae oli yang nomo oli kat patna mo kat pikinini. Long en blong dei, mama bae i mas faenem ol wei blong sapotem famili mo samtaem ol mama mo papa i mas tok long gel, taem tumas presa i kam hemi save lid i ko long suicide.”
Mr Massing i talem se Vanuatu Family Health i stap ranem ol woksop olsem long everi yia from i luksave bigfala nid i stap blong helpem ol yangfala.
Hemi talem se afta long trening ia bae Vanuatu Family Health i sapotem ol yangfala ia blong ko aot mo helpem ol nara yangfala.
Ol yut we ili bin tekpat long reprodaktif helt woksop ia, oli kamaot long ol difren ward long Port Vila, Luganville long Santo, Lakatoro long Malekula mo Lenakel long Tanna.
World Health Organisation i declarem se tinej age blong wan gel i stap long 13 kasem 21 yia.
