Presiden blong Northern Islands Ex-Fisherman Asociasen, Celest Bule hemi talem long VBTC Nius se hemi ova 40 yia nao we oli wet from mani long Kavman.

“Sam long mifala i wok blong 8, 10, 12 yia, mifala i bin fesem had taem long solwota mo taem mifala i kam shoa, sam memba long kavman i kakae mani blong mifala,” Mr Bule i talem.

“Hemia hemi no stret fasin nating from mifala nao i votem olgeta.”

Secretari blong Asociasen, Austin Tari i talem se oli mekem noise from mani blong olgeta blong sam taem nao be from wanem kavman i no luksave olgeta.

“Wan State Minista i bin ansarem kwesten ia long Lida blong Opposition se sam grup blong Tanna oli bin serem VT10 milien mo oli serem mani ia samples long ol kasis long Efate ia be mifala lo Not i no pat lem nomo,” Mr Tari i talem.

“Kavman i talem se bae hemi nosave givim mani ia bakegen mo hemia hemi rong.”

Minista blong Finans i rispon blong talem se ol fisherman ia oli nomo gat raet long mani ia folem wan agrimen we oli bin saenem long taem ia Honoroble Praem Minista hemi Joe Natuman.

“Long floa blong Palemen long yestete (Wednisdei), mi talem se hemi bin gat wan komisen blong Inquiry, hemia hemi Nambawan; Nambatu hemi araon long 1994.

“Fisherman Asociasen hemi tek ova long lease blong Palekula plus evri aset blong slipway we i stap long Palekula mo oli bin manej blong salem of evri kapa, iron, masin wetem ol timba blong haos mo samtaem i pas oli bin salem lease ia i ko long wan nara interest,” Minista Salong i talemaot long VBTC Nius.

“Afta long taem ia we Honorble Praem Minista hemi bin Joe Natuman, oli bin mekem oli saenem wan deit of rilis we State Law i putum tugeta we i minim se olgeta yet oli talem se oli nogat raet bakegen blong kam askem eni moa rilis blong mani we long taem ia oli bin karem nara VT10 milien.”