Wan Personel Tracking Beacon masin i sefem wan lokol fisherman long wik ia taem benzene blong boat blong hem i finis 2 miles aotsaed long Aneityum.

Joel Rawai blong Aneighowhat long Aneityum hemi gat 67 yia mo hemi fesem wan insiden taem hemi stap huk from tuna long Wednesday eli moning.

Long Wik ia, Deputy Commissioner Domestik long Vanuatu Maritime Safety Authority, Kembro Manderson i kasem wan ovasi mesej from signal ia.

Mr Manderson i kolem olgeta long Noumea mo turis bot we i kasem Port Vila tete moning i tekem hem long solwota taem hemi stap tour long Aneityum.

Hemi talem se signal i ko kasem Satelite, afta i i givm signal long Maritime Rescue Response Coordination Senta long New Caledonia mo oli letem Vanuatu Maritime Safety Authority i save.

“Long yestete araon long 12 o’klok mi kasem wan email i kam long Maritime Rescue Response Coordination Senta; Yumi kat wan kondrak wetem olgeta blong oli stap luk ova long yumi long eni distres. Taem oli kasem distres ia oli putum ples hemi 2 miles long Saot East blong Aneityum,” Mr Manderson i talemaot.

“PLP(Personel Tracking Peacon) hemi rijista long New Zealand i mekem mi tink se wan waet man. Long haf pas 1 oli kol bakegen se yu kat eni saen long signal ia o no? Taem ia nao mi ron ko infomem Commissiona blong mifala, ale mi ko mit wetem National Disaster Management Ofis mo mi kolem Deputy Commissioner blong Polis blong stand by nomo sapos yumi save sendem wan plen i ko. Mbe bisi taem blong Xmas i mekem se wan plen i no availabol. I mekem se olgeta long Noumea i kondaktem wan plen mo turis bot ia we i stap long Aneityum blong kam long Port Vila.”

Mr Rawai i talem se wind i bin bloem hem i ko aot mo long 10 o’klok hemi onem device ia.

Hemi talem se long leit aftnun long 4-5pm olsem Air Fos blong New Caledonia i flae i kam from mi.

“Mi luk stret long left saed, turis bot i kam from mi,” Mr Rawai i talemaot.

“Taem oli kam kolosap, Airfos i flae raon six taem. Kapten blong bot i toktok long mi se olsem wanem? Mi se sori fuel long smol bot i vinis, hemi se Benzene o Mazut, mi se benzene, hemi toktok i kobak long ship mo talem se mifala i nidim yu nomo nao. Mi stanap mi sori long bot blong mi wetem ol tul blong huk mbe laef blong mi hemi impoten. Bot hemi drift i ko long solwota mo hemi blong Fisheries.

“Laki se olgeta long Fisheries oli givim long mi smol device/masin ia from hemi useful. I gud blong evri fisherman i mas kat.

“Mi bin tekem fuel hemi naf blong mi raonem aelan mbe i hapen se mi ko huk mi luk tuna, i mekem mi lusum hed mi ko from; Mbe taem mi luksave se fuel i vinis, mi wet blong samtaem, mi faenem se i mas kat sam kakae long bot so from we mi hukum tri tuna, mi katem wan ale mi mekem bait long hem mo hukum tri bigfala snipa fish; Mi tekem aot device ia mi fasem ale mi onem. Afta mi kerap stap klinim fish. Mi redi long kontena blong mi blong fulumap ren from i nogat wota.

Mr Rawai i talem se ol insiden olsem i stap hapen longtaem vinis long hem.

“I kat wantaem oli bin toyem mi aot from engine blong bot i nogud, taem oli kam kolosap mi statem engine mbe i on mbe sapos no mi kasem Noumea,” Mr Rawai i talemaot.

“Taem mi stap long solwota mi no stap fraet from mi oltaem kat hope. God i gud.”

Joslyn Mete, wan famili blong Mr Rawai i krae mo talem tankiu bigwan long help.

“Mi wantem se yumi mas tekem i serious long ol woning we ol otoriti i stap putum aot,” Mr Mete i talemaot.

Vanuatu Maritime Safety Authority i talem se ol bot owna mo ol ship oli mas kat ol sefti tul long bot mo mekem sua se i kat fuel evritaem.