Projek blong planem bak mangrove long Kawenu, Port Vila i hapen long wik ia.

Direkta General blong Ministry blong Forestry Moses Amos, i talem se i blong soem long ol rural komuniti, komitmen blong kavman long laef blong ol pipol from ol disasta we klaemet jens i stap kosem.

Mr Amos i talem se hemi spesel i no from blong planem Mangrove mbe putum bak ol rif shell long solwota.

“Be hemi blong restorem biodiversity, resilience, empawarem pipol long komuniti, mo blong tekem advantage long ol impact blong Klaemet jens,” Direkta Amos I talem.

Praem Minista, Ismael Kalsakau i talem se laef blong ol pipol blong Vanuatu naoia i ko i dipen long ol animol, ol plant mo ol tri long envaramen.

“Jens long ekosistem blong yumi from Klaemet jens, i putum bigfala problem long kakai mo laef blong ol pipol naoia,” Praem Minista Ma’aukoro i talem.

Australian Foreign Minista, Penny Wong, hemi serem experience blong hem olsem fes Climate Change Minista long 2007, mo i luksave laef we ol pipol oli livim tru long ol past yia wetem impacts blong klaemet jens.

“Mi glad se yumi stap wok tugeta naoia mo bai mifala i wok moa, mo mifala i wantem blong wok wetem yufala, from mifala I bin stap lesin. “Klaemet jens hemi wan mata long ol pipol mo ol pikinini,” Senata Wong i talem.

Mr Wong i talem se niu kavman blong Australia bai i kontinu blong patna folem ol aksen we Vanuatu i stap mekem finis mo bai i mekem moa towod klaemet jens.

Event ia Praem Minista, Ishmael Kalsakau i lidim wetem presens blong Australian Foren Minista, Penny Wong, Hae Komisina blong Australia long Vanuatu, Heidi Bootle mo ol nara gavman deleket long prodaktive sekta blong Vanuatu.

By Tiffany Baldwin.