Ol panelist blong Press Club Vanuatu long wik ia i talem se Constitution i no nid blong jenis be pipol i mas unitem spirit blong hem blong inkludum kastom mo wok folem interest blong grasrut pipol.

Hemia from i bin kat ol strong tinktink blong jensem constitution long 2004, 2018, 2019 mo past 12 legislature be i fail.

Vincent Boulekone, fes foma Opposition i kol from moa pawa long Malvatumauri Council blong ol Jif.

“Mama loa hemi diklarem se ol jif hemi kat wan council blong ol jif, hemia hemi givim wan indikesen blong hem se bae hemi no stap olsem wan simpol wan; Council ia bambae i mas ko moa blong kam wan veri strong institutution we hemi kat wan politikol pawa blong hem,”

“Kastom hemi politik ia, hemia nao i lukaot long laef blong pipol. Oli mas kat own polisi blong olgeta. Naoia we i stap  National Council blong ol Jif hemi wan simpol council nomo, hemi nogat pawa be hemi mas kat pawa olsem National Palemen. Palemen hemi kat pawa long saed blong democracy so ol council blong ol jif tu i sud kat pawa blong kontrolem loa we Palemen hemi stap pasem.

“Bifo Palemen i pasem wan loa hemi mas tru long olgeta jif tu blong lukluk se tinktink we hemi stap insaed long loa ia hemi stret o no. Hemi folem stampa biliv blong melanesia value mo christian biliv.

“Hemia nao i nogat yet mo yumi kat. yumi save singaotem se wan hemi Palemen mo nambatu hemi ol jif. Evri taem yumi pasem loa be i nogat wan advaes blong ol jif. Yumi fogetem olgeta evri taem.”

Chief Executive Ofisa blong Malvatumauri Council blong ol Jif, Jif Jean Pierre Tom, i admitim se long pas 42 yia ia yumi stap wokbaot long wan leg nomo ia witaot kastom.

“Ol jif oli mekem tinktink ia from i kat plante content long mama loa we i tokbaot tradition mo kalja blong Vanuatu. Hemi talem impotens long laef blong pipol blong Vanuatu olsem long atikol 73-75 we i talem se taem Vanuatu hemi bon, hemi graon hemi blong ol pipol blong hem be kasem tete weaples nao rul ia oli luk save?

“Sapos yumi no keaful ba yumi stil tokbaot tu loa nomo, Bristish mo French be custom loa bae i no wok nomo. Ol Jif i tink se yumi mas stanap long tu sytem blong karem nation i ko long foret we kastom tu i mas stap insaed. Plante taem yumi pasem ol bill long Palemen, yumi diskasem raon fastaem o?

Foma Director General long Justice & Community Services, Mark Bebe i talem se sapos mama loa i jens bae i mas kat wan referandum(Wan spesel eleksen blong vot long wan samting we oli agri o nogat).

“Witaot mama loa bambae i nogat eni Vanuatu; Sapos yu wantem jensem constitution bambae i mas kat referandum blong hem; Constitution hemi olsem octopus bodi mo hed blong hem, hemi olsem stap blong hem mo ol nara loa blong Vanuatu oli hang long hem. Bae mi givim sam exempol, Public Service act hemi givim efek long atikol 47 long constitution, Electoral act hemi sapos blong givim efek long atikol 17 blong constitution, kavman act hemi sapos blong givim efek long japta 1 blong constitution mo court act hemi long japta 8. So sapos oli talem se hemi nomo yus i minim se ol loa ia i nogat nao,” Mr Bebe i talem.

Mr Bebe i talem se eniwan we i wantem expleinem constitution hemi mas stadi enaf mo mekem research wetem sam long ol old founding papa.

“Hemia blong andastanem spirit blong mama loa; Tete i kat plante oli talem rong ol loa mo mama loa. Mi save talem se i kat plante abuse long sam atikol blong constitution from oli no talem long stret spirit blong loa mo situasen we i sapos blong aplaem. Ol oldfala blong yumi oli no kranke ia. oli putum loa. Fulap yang lawyer naoia oli kamaot oli no stadi gud, oli intepretem sam pat blong hem i rong. Olgeta we oli involv polisi raeting oli mas stadi gud. Mi save talem se fulap we oli abuse tete, wan long olgeta hemi atikol 13(Dencentralization) ia, 38(Presidential powers of Pardon, Commutation and reduction of sentences) mo atikol 47(Judiciary) blong yumi keaful mo hemi impoten.

“Long taem ol mekem mama loa oli traem blong muvum ol seves i ko daon. Wan kavman i stap long Santo mo wan long Tanna jes bifo long Independens. Nao sapos yumi wantem seperetem i mas kat loa i kamaot blong talem. Constitution i protektem Vanuatu blong spit ap olbaot so sapos Santo i wantem brek aot long Vanuatu i mas kat referandum blong hem so hemi tabu.

“Nara wan hemi language, so yumi mas fea long English mo French language. Blong jensem eni pat blong constitution i mas kat tu third blong hem.”

Moderator blong diskasen, Wilson Toa i talem se topik blong mama loa ia i kam blong pipol i andastanem folem Snap eleksen long Octoba.