Wan niu stadi i tekem ples long aelan blong Emau long manis ya, blong lukluk long ol komuniti we i stap long risk folem klaemet jens.

Mo olsem wanem oli rikava long ol jens ya long invaromen.

Blong adresem mata ya, wan projek tim we oli singaotem Strength Project, anda long Dipatmen blong Klaemet Jenj, i bin stap long komuniti blong Marou, Mangarong, mo Wiana, blong lukluk long wanem oli singaotem ”loss mo damej”o ol risk weh i kam antap folem ol problem blong klaemet jens.

Long wan stetmen blong dipatmen long wik ya, stadi ya i karem ol fidbak long olgeta komuniti ya, se ol olfala woman especially ol wido, pipol wetem disabilti mo ol woman insaed long komuniti weh i gat nid, i stap long risk taem i kam long taem blong ol disasta.

Plante long ol wido woman i faenem i had blong rikava afta long wan disasta, folem isiu blong mani, i mekem oli dipen long ol narafala famili.

Olgeta wetem disabiliti tu i fesem plante jalenj long ol taem olsem, blong finem isi akses long klin wota mo ol narafala isiu olsem toilet.

Ol woman tu we oli playem impoten rol long hom blong provaedem kakai, i fesem jalenj wetem klin wota, sanitesen mo saplae blong helti kakai folem damej long ol lokol produse.

Stetmen i talem se i no isi blong adresem ol isu blong los mo damej, folem nomo hae namba blong ol risk blong hem we klaemet jens i kosem sloslo afta samtaem nao.

Mo se igat risk blong fulap impoten eria blong loss mo damej, bai oli save mestem blong adresem.

Hemia olsem loss blong kalja, helt blong pipol, mo wetem keis blong Emau, olsem wanem ol difren plant mo animol i kam wan denja long laef blong ol woman long ol rural eria.