Olsem wan futbol pleya, Lency Fred hemi muv i ko long fil blong refri we i spendem fultaem long hem mo i ko insait long administresen blong futbol hemi livim bihaen wan histri blong hem long futbol blong Vanuatu.
Jerni blong hem long futbol i no en nating, nomata we hemi wan wos pleya.
Lency Fred we hemi kat 56 yia hemi wan popula man we plante man i save nem blong hem mo hemi kam aot long aelan blong Tongoa long Shefa Provins.
Hemi wan man we spendem ful taem blong hem long divelopmen blong futbol long kaontri.
Mr Fred hemi statem karia blong futbol blong hem wetem Shepherds United Futbol klap bifo hemi mekem jois blong muv aot long futbol I ko long refri.
“Olgeta wokabaot blong mi long fil blong refri hemi kam tru long wan pus we Shepherds United hemi mekem blong mekem se mi kontiniu long karia blong mi long fil blong refri,” hemi talem.
Mr Fred hemi mekem fes taket blong hem long 1991 long refri woksop long Port Vila.
Long Semak yia ia we hemi kraduet wetem wan setifiket blong enrolmen blong Vanuatu refri i ko long FIFA, hemi wan long olgeta fes refri long taem ia nao.
“Taem mi mitim taket blong mi long taem ia, eim we mi kat long taem ia hemi blong mi mas kasem wan wol kap, be hemi hapen se mi ko adjivim karia blong mi long taem ia we mi bin ko kasem long Olimpik kems long Atlanta long 1996, Konsefesen kap long Saudi Arabia, Asian kap final long Kuwait mo finali eim blong mi hemi kam blong akomblish long 1998 FIFA wol kap long France.”
Afta long wan saksesful karia blong hem, hemi disait blong kam wan FIFA refri long yia 2000.
“Mi wantem blong mi mas kasem wan mo wol kap bakeken, be unfotunetli I kat plante sekomstanses mo jalenj i mekem se mi disait blong putum notis blong ritae long 2009.
“But tru aot long refri karia blong mi, mi wantem tumas blong mi mas refri insait long wn O-Lik faenal,so mi manej blong mi refri insait long tri (3) Osenia Jampions Lik faenal.”
Mr Lency Fred hemi stap olsem Refri Divelopmen Ofisa (RDO) blong VFF blong 5 yia.
“Ol ajifmen blong mi ia nao tru long help blong VFF, OFC mo ol narafala kolik blong mi we mifala i help blong putum viu refri we i kasem wan taem we oli bin kasem level olsem mo long taem ia wan long olgeta saksesa blong mi hemi Jeremy Karae we folem Semak rod we mi folem, so hemia nao samfala gol blong mi we taem mi kam insait olsem wan RDO mi ajivim,” hemi talem.
Fred hemi risaen mo hemi kam insait long administresen eria, mo hemi bin stap insait long exekiutif blong Shefa Futbol Asosiesen (SFA).
Afta long taem blong hem insait long exekutif blong fiu manis, hemi kam Presiden blong Shefa Futbol Asosiesen long 2021, mo hemi sefem 2 yia tem blong hem blong riplesem, leit Tenearu Maki, mo tu hemi president blong Futbol Lik long aelan blong hem (Tongoa Futbol Lik).
Hemi kam insait tu long administresen blong VFF blong helpem federesen blong help tokbaut sam divelopmen blong futbol mo long las yia (2023) exekutif blong VFF oli putum hem i kam olsem akting VFF Presiden.
Hemi long taem we VFF anda long presidensi blong karent VFF Presiden, Lambert Maltock taem hemi stap long wok blong hem ovasi, mo semtaem olsem wan co-jeaman OC jampions lik we hemi karem evri kaontri i kam long Vanuatu mo enjoyem full OFC futbol tunamen.
Olsem wan foma refri long Osenia mo FIFA, Fred hemi konvem se wetem olgeta adjifmen ia mo longfala rod blong hem long futbol, hem olsem wan man Shefa mo praod man Tongoa hemi glad tumas se hemi mitim expektesen blong hem.
Hemi samfala gol we Mr Fred i wantem blong hemi kasem wan dei, be evri tingting blong hem i kam kasem en blong hem las yia.
“Mi wantem talem tankiu long lidasip blong Mr Maltock we tru long hem VFF exekutif I save kam putum mi olsem akting presiden, hemia wan laif taem opotuniti u save kivim long mi mo save trastem mi long wok ia.
“Mo tu blong aknoledjem olgeta mein man we oli stap bihaen long sakses mo wokabaot bloing mi long futbol mo olgeta kolik blong mi we oli save helpem mi tru aot long futbol jerni blong mi.
“Moa aknoledjmen tu i ko long Port Vila Futbol Asosiesen (PVFA) tru long hem nao mi save kam huia mi naoia, tru long olgeta kems blong hem we mi refri long hem.”
Hem talem tankiu i ko tu long olgeta bikfaka nem blong PVFA long taem ia we hemi, Shepherds United, Tafea FC mo Erakor Golden Star long olgeta jalens we oli bin kivim long hem olsem wan refri, we i mekem se hemi impruvum pemomens blong hem.
Tem blong Mr Fred olsem Presiden blong SFA hemi kam long en blong hem long yia ia 2024, mo hemi wan long taem gol blong hem wetem 2 yia we hemi spendem wetem olgeta i blong kat wan pleya blong olgeta i ko kasem long profesonal lik blong Port Vila.
Las wokabaot blong hem naoia hemi blong traem kam insait long fil blong refri bakeken blong lukluk se i nomo kat ol FIFA refri mo hemi lukim wan bikfala drop long eria ia, so hemi wanfala las wok blong hem blong strengtenem level blong refri long kaontri bifo hemi endem wokabaout blong hem.
