Presiden blong National United Pati, Bruno Leingkone, i lusum petisen blong hem long Suprim Kot tede moning.
Hemi lusum seat blong hem long Palemen folem wan oda we Spika Simeon Seoule i mekem long las wik from we hemi no gat pemisen blong no atendem 3 konsecutif siting blong Palemen.
Lawya blong Mr Leingkone, Justin Ngwele, i bin rekwestem wan stay oda mbe kot hemi no akseptem bakegen.
Justis Bill Hastings hemi agri se Mr Leingkone i no bin atendem 6 konsecutif siting mo hemi no gat pemisen blong Spika, taem we hemi go long South Korea blong medical tritmen long July i go kasem Septemba.
Justis Hastings i talem se wetem 6 siting we Mr Leingkon i bin absent, i includum 3 konsecutif siting long August 10, 16 mo 17 we loa i mekem se sit blong hem i vacant.
Mo tu Justis Hastings i faenem se Mr Leingkone i no bin kasem eni pemisen long Spika blong i absent we loa i rekwaerem.
Lawya blong Mr Leingkone, Mr Ngwele, bae i lojem wan appeal bifo 4pm tumoro
Wetem vakansi ia, kavman i lusum wan MP blong hem mo i minim se Palemen i kat 51 memba nomo mo wan absolut majoriti i 26 MPs.
