Kot bae hemi mekem wan desisen tumoro sapos President blong National United Pati, Bruno Leingkone hemi stil save stap olsem wan memba blong Palemen mo wet long wan petisen we istap bifo long Supreme Kot.
Mr Leingkone hemi mekem aplikesen ia tedei afta we Spika blong Palemen Seoule Simeon hemi mekem wan desisen long Mandei blong aotem Mr Leingkone olsem memba blong Palemen.
Spika Seoule i talem long Mandei se Mr Leingkone hemi no gat permisen blong no atendem 3 konsecutif siting blong Palemen.
Stay oda we Mr Leingkone hemi aplae from ia, hemi blong wet long hearing blong petisen we Mr Leingkone hemi putum long Supreme Kot blong harem legaliti blong desisen blong Spika.
Petisen we Mr Leingkone i putum bae Supreme Kot i harem long Fraede namba 29 Septemba.
Lawya blong Mr Leingkone, Justin Ngwele, i talem se sapos we stay oda ino ko tru, ol pipol blong Ambrym mo constituency bae save stap olsem ol disadvantage vota.
Garry Blake, lawya blong Spika, i talem long kot se Mr Leingkone, i no act stret mo hemi bin save finis long Mandei se jea blong hem i vacate, be hemi no bin resaen olsem wan minista.
