Temporari stop blong Labour Mobility passport aplikesen kasem July 2023 hemi blong kontrolem aplikesen mo wok blong printim flatem ova 2000 aplikesen wetem kontrol blong print system.
Director blong Passport Services, i talem toktok ia long VBTC Nius tete.
Mr Markson i talem se long Novemba kasem January 2023 i kat ova 6000 buklet blong passport blong olgeta we bae oli travel long Labour Mobility mbe less long 1000 nomo oli travel aot.
“Hemi wan disisen we hemi long konsaltesen wetem ol ofisa blong passport; ol infomesen we yumi karem tru long wan ripot we i kamaot long ofis blong Passport hemi soem se long manis blong Novemba, Decemba 2022 mo January ia, yumi printem araon 6000 buk blong passport blong Labour Mobility Scheme blong Australia mo New Zealand; So rikod blong yumi i soem se olgeta we i aot blong ko long Seasonal Workers Program long January ia hemi no bitim 1000. So bae yumi kat araon 5000 passport buklet we ol man i holem i stap naoia mbe oli no travel so mi enkarejem ol agent blong yusum olgeta pipol ia,” Mr Marskon i talemaot.
“So plante oli print mbe oli no travel so ol agent i mas mekem yus long ol man ia. Olsem yumi save se hemi raet blong wan citizen blong hemi mas karem wan passport buk mbe arenjmen o stop ia hemi blong smol taem nomo. Afta long July yumi openem bak bakegen. So nara wei hemi save helpem ol bisnis haos blong yumi tu blong yu we yu stap nomo, yu tinktink blong ko wok ale wet kasem long July.
“Naoia i kat ova 2000 passport aplikesen we yumi karem long manis blong January ia nomo wetem February. So ol aplikesen ia yumi no printem yet.
“Ale ol aplikesen we yumi holdem taet mo no wok lem yet hemi from sam isu olsem foto o birth certificate i no stret hemi araon 600 we hemi stap yet, hemia long Port Vila ia.
Mr Markson i talem se long Santo i kat 400 aplikesen mo Tanna hemi 182 long eli February ia.
“Ofisa blong yumi long Santo i stap long ofis naoia mo stap wok long ol passport ia we oli kolektem long manis blong Decemba,” Mr Markson i talem.
“Ofisa blong Tanna tu i stap long Port Vila mo stap wok long araon 200. Manis January nomo yumi kolektem ova 100 plas. So trend naoia yumi luk se i mas kat sam taem blong kliarem ol aplikesen ia. Yu we yu sabmitim ol aplikesen ia yu mas rere blong koleksen.
Mr Markson i talem se naoia oli wok long tu shift.
“Wan shift long 8am kasem 3pm; Nara shift i stat long 3pm kasem 12-1 long eli moning,” Mr Markson i talem.
“So tu shift ia yumi statem long las wik blong help printim ol aplikesen ia mbe yumi luk se namba blong ol aplikesen ia i stap ko bigwan nomo. Nara samting yumi mas manejem gud proses system blong yumi from hemi slo mo taem yumi kat plante print blong printim ale man i no yusum, hemia i kam wan risk long passport print blong yumi. Moa buk yumi printim ale pipol i no travel long hem so tat why yumi mekem recommendation i ko long ofis blong Minista.
Mr Markson i talem se naoia ol aplikesen blong labour mobility i stop mbe ol nara category i on nomo olsem ol studen o nara pepes hemi save kam.
Passport buklet naoia i kat 4,000 mo 27,000 bae i kam yet.
