Seasonal woka program i save afektem agriculture prodaksen sapos i nogat gudfala managemen blong kambak mo invest long graon.
Foma Director General blong Agriculture ministry, Moses Amos i talemaot long VBTC Stret Tok program long wik ia.
Mr Amos i talem se plante vilij long aelan oli luk se naoia ol olfala nomo oli stap, plante yang fama oli joinem seasonal woka program.
“Bae hemi afektem consistensi blong saplae blong prodaksen blong rut crop; fo exempol, bifo sam seasonal woka i ko stap six manis naoia sam oli stap wan yia o 3 yia. Nao hemia bae i kat wan bigfala impak long prodaksen consistensi blong saplaea long prodaksen blong lokol kakae long ol komuniti blong yumi,” Mr Amos i talem.
Eria Administrata blong Not Ambrym, Jackson Willie i talem se wan regulation i mas stap blong ol woka i kambak mo yusum skil long graon.
“Sapos Dipatmen blong Agriculture hemi stap talemaot ol tinktink se yumi wantem impruvum prodaktiv sekta; Wan samting we mi tink se bae hemi wan must blong ol otoriti olsem Labour, agriculture wetem ol agent hemi blong mekem i kam wan criteria blong ol seasonal woka blong yumi we i stap ko, sapos oli ko mo kam mbe oli mas kat wan farming blong soem se yes oli stap ko kam mbe oli invest long graon. Mbe taem yumi talem nomo olsem ia we i nogat wan regulation bae yumi luk woka i kambak pa sam nomo oli wok long graon mbe sam oli spel nomo ale oli kobak,” Mr Willie i talemaot.
“Mi sapotem tinktink blong Mr Amos, taem yu wan woka yu ko ovasi, yu no wok long ofis ia yu wok long farm, yu mas kambak investem save blong yu long eria council we yu kamaot long hem blong yumi save groem ol farm.
“Hemia bae i generetem inkam bakegen i kam insaed. Ating oli kambak oli mekem wan farm blong pineapple o wan nara kakae.”
Mr Amos hemi talem se oli saenem wan niu frame work wetem Ministry blong Yut blong pushum fowod tingting blong ol skill mo save we ol yangfala oli lanem taem oli travel i ko long seasonal wok.
“Blong mifala i traem blong adresem blong luk bigfala namba blong ol yangfala we oli stap muv i ko aotsaed long kaontri blong wok,” Mr Amos i talem.
“Taem oli ko wok ovasi hemi rili gud from oli tekem mani i kam mbe jalenj nao taem yu karem mani i kam, yu kam pem rice long hem ale yu kakae; Evritaem yu pem wan bag rice yu sapotem fama blong Australia, Thailand o Vietnam o wea ples we rice ia i kamaot long hem, so yu no sapotem ol fama blong yumi. So Ministry i stap wok blong help blong provaedem ol seves blong enkarejem ol yangfala ia blong stap long ol komuniti blong olgeta.”
Eria Administrata blong East Malo, Malon Rasu i talem se fulap woka taem oli kambak oli fokas bigwan blong impruvum gud laef blong hom fastaem.
“Mbe Agriculture prodaksen i no tumas; I kat sam woka oli kambak oli involv long ol projek blong Pepper blong planem mo tu ol nara rut crop,” Mr Rasu i talemaot.
Long 2020, Dipatmen blong Agriculture hemi lonjem wan plan blong Labour Mobility long sekta blong agriculture.
“Mein pepes blong hem i blong transferem skil blong ol seasonal woka blong yumi i kambak long Vanuatu blong benefitim agriculture sekta; Seken hemi blong mekem sua se ol woka oli kambak oli mas invest mo hemia nao rodmap we dipatem wetem ol agensi i stap wok from. Mo long yia ia bae yumi kat wan Agriculture Ofisa blong wok plante wetem ol agent blong faenem ol woka we oli stap ko mo kambak blong bildim ap capasiti mo tu pasem ol skil we oli tekem long Australia mo New Zealand i ko long ol pipol we oli nogat opotuniti ia blong ko ovasi,” Director blong Agriculture, Antoine Ravo i talemaot.
Mr Ravo i talem se wei ia oli save kontribut tu long agriculture sekta long Vanuatu.
“I kat Vanuatu Skills Partnership we yumi stap wok wetem olgeta long ol training mo tu ol workshop; Mo this yia bae mifala i ko hed long Family Farm Bisnis training so olgeta we oli kambak long wok ovasi we oli nosave kobak pa yumi helpem olgeta blong pasem aot ol skill ia long ol nara fama,” Mr Ravo i talem.
