Kavman i talem se Labour Mobility scheme i mas ko hed from hemi sos blong economic.
Minista blong Internal Affairs mo semtaem Deputy Prime Minista, Honoroble Ismael Kalsakau i talem toktok ia long health tok blong COVID-19 long tete(Tuesday).
Minista Kalsakau i talem se scheme ia i tekem mani i kambak long Vanuatu wetem ol hom.
“Kaontri blong New Zealand mo Australia oli rikwarem moa wokman blong Vanuatu blong ko wok,” Minista Kalsakau i talem.
“Oli interes tumas long ol wokman blong Vanuatu. Taem we pandemic hemi stap hemi wan gudfala sos blong inkam mo revenu blong ol haoshold blong Vanuatu.
“Mo dipen long ol rikruit taem, olsem Australia i kat faev wik blong oli rikruit. Mo yumi stap toktok wetem olgeta(olgeta long aelan) blong fasilititeitem rod blong olgeta i save kam blong jam long plen mo ko wantaem. Mo oli no kam blong stap hang araon long plesia blong bambae sik i threatenem laef blong olgeta.
“Kontinu blong jekem electronic infomesen tru long Labour Dipatmen bambae ol aplikesen blong rikritmen bae oli kontinu mo bae ol pipol oli ko. Moa pipol i ko, oli mekem moa mani blong sendem i kambak long Vanuatu blong mekem economi blong yumi i ron. Kontinu blong ko mekem ol jek ap, ol x-ray mo polis clearens.
Minista Kalsakau i talem se ol ministry bae i kat ol rikwa namba blong ko aksesem ol seves ia.
“Bae i kat wan protocol we i talem se amas nomo i save ko insaed mo yu stanap long line,” Minista Kalsakau i talem.
“Hemia blong alaoem ol seves blong kavman i ko hed sloslo. I kat jalenj mbe pa yumi traem bes blong manejem. ”
Minista Kalsakau i talem se civil registry mo ID management bae i openem ol doa blong hem bae i no longtaem tu blong pipol i save kat akses long birth certificate.
Hemi talem se passport booklet bae i kambak long wik ia.
“Bae yumi konfemem taem ol passport buk ia i stap long ofis,” Minista Kalsakau i talem.
“I nogat eni passport i print long steij naoia. “Emergency passport i availabol taem sapos i kat nid i reis mo stret ministry i otorisem. Spesel category visa i grant long ol medikol pipol we oli kam insaed blong help aot wetem Ministry blong Health.
Minista Kalsakau i talem se taem oli kam wok Vanuatu, oli karem passpot blong olgeta mo oli yuusm spesel visa.
Hemi talem se Council blong ol Minista i stap mit blong lukluk long situasen mo Minista blong Health bae i kamaot blong talem aot sam niu jenis blong helpem laef blong pipol i ko hed.
