Dipatmen blong Weta Services i kol from kwik rikruit long ol posisen blong Geo-Hazards blong impruvum seves blong givim woning.

Weta Forecast Maneja, Fred Jockley, i mekem kol ia long wan Press konferens long wik ia folem ol komplen abaot tsunami we i volcano blong Tonga i bin kosem long eli January ia.

Fred Jockley i talem se i nid blong mekem ol niu rikrumen blong fulum ap ol posisen blong Manager Geo-Hazards, tu Principal Scientifik Ofisa blong Volcano mo Seismic mo wan Senior Tsunami Ofisa blong tekem ples blong ofisa we i jes ded long Novemba 2021.

Mr Jockley i talem se i no mas kat eni poltikol long ol rikruit ia.

Vanuatu Meteo mo Geo-Hazards i talem se dilei blong tsunami woning hemi from hemi wan sabmarine volcano tsunami.

Wan mama blong Nguna aelan we i bin pat long telephon rikwes long Radio Vanuatu i no longtaem i talem se long vilij we oli stap long hem, plante pipol i kat fon mbe i nokat netwok.

“Ova 100 pipol i kat fon mbe i nokat netwok blong kasem ol tsunami woning,”Mama ia i talem.

“Long aftanun long Satete ia ren i bin ren, samples 3pm kasem 5pm mifala i no bin save enitink. So i stap ko from haf pas faev ronem 6pm, mi mo hasben blong mi stap ko daon solwota blong jekem wan net mo hemi luk wan taet long foret blong rif, hemi talem long mi se ating earthquake mbe yumi no harem, taet i pul we. Ale i stap ko from 8pm, ol man we oli sitaon daon long solwota i stap singaot se eh solwota i stap jenis. Mekem mi traem blong kasem wan boy blong mifala we i wok long Meteo from netwok i nokat mo Radio i no talem enitink.”

Eria Administrata blong Aneityum, Selwyn Daniel, i talem tankiu long Meteo blong explenem niufala experience ia.

“Long taem ia mifala i no kasem eni woning long ol mobile fon mbe mifala i laki blong harem wan bigfala noise,”Mr Daniel i talem.

“Noise ia yumi evriwan i mas harem ia from i loud mo taem mifala i harem, mifala i tink se sabmarine volcano we i stap kolosap long mifala. So mi ring i ko long Port Vila blong askem mo oli se volcano blong Tonga.  Long taem ia mifala i letem ol pipol i save long infomesen kwiktaem from plesia hemi wan ples we yumi stap kasem tsunami oltaem.

“I mekem se ol disasta ofisa long vilij i mas muvum ol pipol i ko antap long hil mo ol pipol i silip koko kasem moning oli jes kambak daon long vilij.”

Mr Daniel i talem se i bin kat smol damej nomo long Aneityum.

Mr Jockley i talem se wan regional tim bae i mit long zoom long february 3 blong diskas long hao blong impruvum system ia.

Hemi askem kavman blong sapotem olgeta wetem moa vatu blong oli save ko raon long ol komuniti mo mekem moa awenes blong tsunami mo ol volcano.

Mr Jockley i talem se ol pipol oli mas tink hevi long ol tsunami dril exercise.

“Long Tsunami dril exercise long Luganville, smol pipol nomo i kam pat long hem,”Mr Jockley i talemaot.

“Pipol i mas stap alert evri taem from yumi no holem nature.”

Vanuatu i kat tri sabmarine volcano long solwota.