Ol pipol we oli stap kambak long Vanuatu bae oli spendem 10 dei long kwarentin.
Surveillance Maneja long Ministry blong Health, Wendy William, i talem se risen hemi from plante pipol i tekem tu stik blong COVID taem oli kambak mo ministri risponsibol i yusum wan kasem faev dei nomo blong faenem wan virus insaed long bodi blong wan man taem oli stap long kwarentin.
Mrs William i talem se risen ia nao i mekem namba blong kwarentin bae i nomo stap long 14 dei.
Hemi talem se ten dei kwarentin ia i stat long eli February long taem we fes repatriation flaet i kam long kaontri.
“Wetem evidens we i kamaot mo rivision we ministri i lukluk long hem, naoia yumi katem dei blong kwarentin i ko long 10,”Mrs William i talem.
“Ridaksen blong 10 dei ia hemi blong mekem sua se yumi kontenem ol COVID kes insaed long kwarentin. Mo hemi alaoem yumi long survilens blong capturem tu sapos wan man hemi expos long virus ia ovasi i kam. Long 10 dei ia, yumi save faenem ariap sapos wan persen i kasem virus ia.”
Mbe Mrs William i talem se sapos risal blong COVID tes i positiv long taem ia bae ministri blong health i diklarem moa deit blong ol pipol ia i stap fastaem bifo oli aot.
“Wetem kat daon dei blong kwarentin ia, yumi gat ol jenis long ol dei blong testing blong olgeta pipol we oli kambak mo stap insaed long kwarentin. Taem oli kasem kaontri oli save tes long fes dei mo dei eight. Afta long ol tes ia, bai tim i lukluk bak long ol risal sapos oli no sik bai oli rilis long dei ten nomo,”Mrs William i talem.
General Manager blong Moorings Hotel long Port Vila, Joe Betsesai, i talem se reit blong 10 dei kwarentin ia hemi VT75,000.
Mr Betsesai i talem se VT7500 hemi reit blong wan naet long kwarentin.
Hemi talem se fi blong kakae hemi no inklud long VT7500 we i minim se ol pipol i mas pem own kakae blong olgeta.
Hemi wan mas blong National COVID-19 Tasforce Committee blong evri pipol we i enterem Vanuatu i mas soem certificate blong vaccination blong talem se oli tekem tu stik blong COVID-19.
VBTC Nius i andastanem se eni pipol we i no tekem stik blong COVID-19 i nosave kam insaed long Vanuatu.
