Stay oda blong Kot i talem Teaching Service Commission (TSC) blong rispektem ol raet blong ol tija mo putum bak olgeta long payroll.
Kot i talem blong TSC i pem bak ol salary blong ol tija weh oli stap long suspension mo termination folem stay oda we Supreme Court i givim long namba 28 November 2024. Stay oda hemi grantem stay blong ol suspension, termination mo namba 3 hemi blong TSC i kontinu blong pem ol tijas weh oli stap long industrial strike.
Sekretari Jeneral blong Vanuatu Tija Union (VTU), Jonathan Yonah, i talem yestedei long ol membas blong VTU blong expectem ol back pay blong olgeta long payday wik ya folem kot oda. Hem i explain seh TSC i should stat pem ol back pay weh oli owem long olgeta since oli stopem ol salary pay blong olgeta.
Mr. Yonah i kol strong long Ministry blong Education mo TSC blong act kwik mo rispektem kot order ia. Hem talem se sipos oli no folem order, bae hemi kam olsem wan “condemn of court,” mo bae i kostem olgeta moa long taxpayers.
Hem i askem Head blong state tu blong tekem aot Acting Chairman blong Teaching Service, blong mekem se ol problem blong leadership mo competency oli no blokem way fowod blong education long Vanuatu.
