Suprim Kot i bin sakemaot long 12 Epril klem blong 2 famli weh i bin lisimaot kraon i go long sam investa afta weh i faenemaot se tufala i bin karem mani blong kraon ia finis.
Tufala famli ia, anda long nem Kaltatak mo Kalmet Kampani Limited i klem seh Marcel Andre Brugger mo Fabienne Brugger oli no bin pem premium blong lis blong kraon ia weh hem i VT 18,000,000.
Kampani blong tufala famli ia i klem tu seh folem agrimen weh oli mekem wetem ol investa ia, tufala lessees i sut pem VT 3,000,000 evri yia i go long olgeta be oli no bin pem stat long 2015 kasem 2023.
Suprim Kot i faemem aot seh tufala investa ia i bin karem wan lon long ANZ Bank mo pem lis blong kraon ia finis i go long tufala famili ia long 16 Januari 2015. Beh from tufala i feil blong pem bak lon, ANZ Bank i karem paoa tru long kot blong salem bak kraon ia.
Kot i faenemaot tu seh tufala famili ia i nogat raet blong ol investa ia oli pem olgeta VT 3,000,000 evri yia from tufala i no mitim ol kontisen weh i stap long agrimen blong olgeta.
Folem kleim weh Kaltatak mo Kalmet Kampani Limited i mekem, tufala investa ia, Marcel Andre Brugger mo Fabienne Brugger i mekem wan apli blong Kot i sakemaot klem ia.
Suprim Kot Jaj, Oliver Saksak i rul long feva blong Marcel mo Fabienne Brugger mo sakemaot klem blong Kaltatak mo Kalmet Kampani Limited.
