Lida blong Nasenol United Pati, Hon. Bruno Leingkone iko long kot tedei blong mekem apil aikensem desisen blong kot we i talem se hemi lusum jea blong hem long Palemen.
Tedei, lawya blong Hon. Leingkone, Peter Dunning KC, i talem long kot se law i no nidim Mr Leingkone blong askem pemissen blong Spika blong Palemen, Hon. Simeon Seoule, blong no attendem Palemen.
Hemi talem tu se, taem we Spika i bin save se Hon. Leingkone i stap long South Korea blong medikol tritmen, Spika i no bin declarem seat blong hem vacant kasem taem we hemi bin kam bak long kantri.
Hemi talem bakegen se, wei we Spika i no bin traem blong mekem eni samting taem we Hon. Leingkone absent, hemi showem se hemi oraet wetem absens blong hem.
Lawya blong Spika, Garry Blake, i bin talem long kot se law hemi nidim ol MP blong askem pemisen blong Spika blong save absent.
Hem i talem se hemia from we law ya i stap blong mekem sua se ol memba blong Palemen i attendem ol sitings evritaem.
Long namba 25 Septemba, Spika blong Palemen i bin deklarem seat blong Hon. Leingkone hemi vakent from we hemi no gat pemisen blong no atendem 3 konsecutif siting blong Palemen.
Long namba 2 Oktoba, Suprim Kot i mekem wan desisen se oda blong Spika hemi stret. Be Kot blong Apil i givim wan stay oda we i minim Hon. Leingkone i stap wan memba blong Palemen kasem desisen blong apil.
Kot blong Apil bae i anaonsem desisen blong hem long Fraede nekis wik, namba 17 Novemba.
