Pablik Seves Comisen (PSC) bae i mas pem kolosap Vt900,000 i ko long wan wokman we PSC i bin sakemaot hem.
Suprim Kot i faenem se aksen blong PSC blong sakemaot woka ia hemi no folem law mo PSC i mas pem aot kontrak blong hem.
PSC hemi bin apointem Gordon Arnhambat olsem Nasonal Kodineta blong Lands Management Unit long Febuari namba 13.
Apointmen ia hemi blong wan kontrak blong 3 manis be PSC hemi teminatem long Mei namba 14, 2023.
Mr Arnhambat hemi mekem wan klem blong PSC i mas pem kontrak blong hem mo kot i rul long feiva blong hem long wan disisen we kamaot long las wik.
Kot i faenemaot se PSC i mekem disisen blong revokem apointmen ia from Mr Arnhambat hemi bin konvikted long wan kriminal kes long Magistrate Kot.
PSC i klem tu se nomata long apointmen leta, Arnhambat i no saenem eni kontrak wetem PSC.
Nomata we PSC Act i alaoem blong Comisen i save terminate sapos man i gat kriminol konviksen, Suprim Kot Jaj Oliver Saksak i talem se Section 36 blong Act ia i talem se bae i mas gat wan disiplinary board i lukluk long isu olsem.
Long kes blong Arnhambat, i nogat eni disiplinary board i sitaon blong lukluk long hem.
Amaon we PSC i mas pem long Mr Arnhambat hemi inkludum 3 manis salari, 14 dei notis, mo 6 taem severens pay from terminesen blong hem ino stret.
