I gat bigfala nid blong Kavman i biltim wan fasiliti we i gat ol man blong lukaot long ol pipol we oli gat mental problem.
Daerekta blong Koreksenal Sefes, Johnny Marango i mekem toktok ia from namba blong ol pipol wetem mental problem insaed blong ol Koreksenal Fasiliti raon long kaontri i stap go antap.
VBTC Nius i bin toktok wetem Mr Marango mo faenemaot se naoia hem i nomo wan niu samting blong pipol wetem mental problem oli go insaed long Koreksenal Senta from i nomo gat wan narafala ples.
Taem wan man wetem mental problem i mekem wan kraem, Kot i sentem hem i ko insaed long Koreksenal sistem, be Director Marango i se ol ofisa blong hem oli nogat trening, kapasiti, mo kepapiliti blong dil wetem ol pipol olsem.
Folem Lo, oli save rimandem wan man insaed blong Koreksenal Sental kasem 14 dei. Afta long 14 dei, ofenda ia bae i mas pas long kot blong kot i save ekstendem remand blong hem o i save beilem aot hem.
Long olgeta we oli gat mental problem, oli mas rimandem olgeta taem oli risivim tritmen kasem taem oli fit blong pas long kot. Be i nogat eni Legislesen we i givim moa daereksen o paoa blong hao Koreksenal Seves i save dil wetem ol pipol wetem mental problem.
From i nogat propa legisleisen, i gat wan keis we wan man wetem mental problem i stap insaed long remand kolosap 7 yia from hem i stap tekem tritmen blong bae i save pas long kot. Nomata long ol tritmen mo asesmen, hem i no soem impruvmen mekem se kot i bin disjajem hem.
Wael Koreksenal i stap usum ol riabiliteisen prokram blong helpem ol diteini, i nogat eni prokram we i disaen espeseli blong ol pipol wetem mental problem. Wan wei we oli stap traem blong helpem olgeta hemi tru long ol tritmen weh olgeta blong Mind-care klinik oli stap mekem.
Mr Marango i talem long VBTC Nius se i gat ol keis tu we ol famili oli no wantem blong Koreksenal Seves i rilisim ol relatif blong olgeta we oli gat mental problem i go bak long komuniti. Wan risen hem i from fulap man oli ting se Koreksenal Senta hem i stret ples blong ol man wetem metal problem.
“Hem i rili hat blong mifala i handelem olgeta we oli mentali afekted,” Daerekta blong Koreksenal Sefes i talem.
“Taem olgeta we oli gat metal problem oli kam long Koreksen, bae hem i hat blong oli improve, from sotej blong speis, sikuriti mo sosol sapot.”
“I nid blong gat wan propa fasiliti, blong lukaotem mo provaidem sosol sapos long olgeta konvik we gat mental problem.”
Hem i se i gat ol taem weh ol pipol wetem mental problem oli kam akresiv mo nidim moa adensen long ol ofisa mo tu ol narafala inmate.
“Hem i wan veri impoten sevea we kavman i nid blong step in from i nidim propa fasiliti blong hem, proba legislesen mo propa pipol we oli tren blong save lukaotem ol pipol wetem mental problem,” Marango i talem.
Nomata long hem ia, taem wan man wetem mental problem i stap insaed long Koreksenal Senta, Kot i stap givim oda blong oli save kasem tritmen be taem wan man wetem mental problem hem i stap aotsaed, hem i no isi blong hem i voluntia from tritmen.
Isu blong ol man we oli gat mental problem hem i no wari blong Koreksenal Seves nomo, from namba blong olgeta i stap kamantap tu long ol komuniti. Hem ia hem i wan risen tu weh kavman i mas lukluk long fasiliti mo ol profesenal blong oli save profaedem seves long olgeta.
