Pipol i konsen long hae praes blong kakae long ol sto folem COVID.
Wan lokol long Whitesands, Tanna, Poita Ralph i talem se praes blong ol kakae olsem bag rice i sas tumas.
“Long Lenakel, taem mifala i ko blong pem rice mo tin; bag rice blong25 kilo hemi 4900, VT 4800, 4500,” Mr Ralph i talem.
“Mo taem ol smol sto owna i tekem ol kakae ia i kam long rurol komuniti, oli jajem moa.
“Outbreak blong COVID long Santo mo Port Vila i mekem ol kakae long ol sto long Lenakel i sas, i sas bitim we i stap long Port Vila.
“Ol flex kad blong Digicel mo Vodafone i sas tu olsem rifil blong VT200 i ko long 400 mo even sam ples i kasem VT500.”
Eria Secretary blong East Santo, Angelo Wass, i talem se i nokat kontrol long ol praes blong ol kakae naoia.
“Taem man i ko long town long Luganville, hemi luk se praes blong kakae tu i sas,” Mr Wass i talem.
“Mi bin ko raon long olsem eria secretary blong kolektem ol bisnis laesens, mo mi notisim praes blong ol kakae mo i kat bigfala difrens, hemi no jip. Hemi hae lelbet mbe man i arem nogud mbe i mas ko pem kakae long sto.
“I mas kat kakae long haos mo hemi no isi tu; ol bigfala komuniti olsem Port Olry mo Hog Harbour i kat cooperativ mbe ol smol komuniti ol smol sto i nosave mitim evri nid blong ol man. So muvmen blong ol man tu i ko daon, olsem oli manejem. I kat enaf man nomo long ol trak blong ko long town.
Antoine Boudier, Jeaman blong Vanuatu Chamber blong Commerce mo Industry we i lukaot ol bisnis haos , i talem se ol sto i no sud mekem praes olsem.
“Naoia ol praes long Wol i ko antap from isu blong transpot, ” Mr Boudier i talem.
“Yumi mas save se fastaem taem yumi stap pem wan kontena i kam long Vanuatu long Australia, praes blong moa hae from praes blong fuel long Wol hemi ko antap i mekem se ol shipping laen i stap inkrism ol cost blong olgeta. Fulap i save se mein kakae blong yumi hemi rice. Naoia blong talem se praes blong rice bae dabol mi no tink se bae i dabol from mein saplae i kam long Australia mo Vietnam from oli no afek long war we i stap hapen long Ukraine. Mbe sam nara kakae we i kam long Europe nao bae i save afektem yumi.
Minista blong Finans mo Economic Management, Johnny Koanapo, i rispon blong talem se blong Private Sector hemi tekem advantej blong bloem ap praes hemi no help long had taem ia.
“Mi wantem askem evri pipol we oli mekem bisnis blong oli mekem ol praes i stret nomo blong mekem se situasen i no ko ova long pawa blong selen we oli i stap,” Minista Koanapo i talemaot.
Minista Koanapo i talem se hemi askem strong blong Price Control Unit i mekem ol wok blong olgeta.
“Mi expektem wan ripot blong olgeta long wik ia blong oli givim long mi blong mi save kamaot blong expleinem,” Minista Koanapo i talem.
Minista Koanapo i mekem kol long ol bisnis haos blong stopem ol hae jaj ia.
Lokol Mr Poita long Tanna i talem se praes olsem bae i mekem man i safa mo.
