I kat kol blong kalja i stap insaed long ol developmen projek blong wok mo holem taet kastom.

Maneja blong Vanuatu Cultural Center, Edson Willie, i mekem kol ia long wik ia folem plante komplen we oli stap kasem se plante divelopmen raon long Vanuatu i stap damejem ol kalja o tabu ples.

Mr Willie i admitim se i kat komunikesen brekdaon we i minim se ol Kavman ministry i no wok wetem Vanuatu Cultural Center nomo.

Hemi talem se center i risivim ol ripot long Tanna mo Malekula se ol kolta rod projek i distroem plante kaljarol heritej olsem ol identiti blong olgeta.

“Mi stap proposem olsem se sapos i kat wan divelopmen projek samples, plis lukluk long cultural center,”Mr Willie i talem.

“Yumi evriwan ol man Vanuatu. Mo evri 83 aelan blong yumi i kat ol kastom mo kalja blong hem wetem ol tabu eria. Fulap taem ol divelopmen we i stap hapen long ol aelan ia, mifala i nosave koko kasem taem mifala i kasem ol komplen se divelopmen ia i spoilem tabu eria long aelan ia.

“Mi askem gud blong ol projek olsem i mas lukluk long kalja tu insaed blong semtaem holem taem kastom mo kalja.”

Mr Willie i wantem luk se i kat jenis long fasen blong wok tugeta wetem Vanuatu Cultural Center long ol taem we i kam.

“Yumi jes no enkarejem ol pipol blong ko long ol aelan mo damejem ol tabu eria from i rong,”Mr Willie i talem.

“Kastom mo kalja hemi histri blong yumi, ples ia nao yu save stanap long hem blong talem se yu man plesia. I semak long ol nara kaontri, taem yu travel, yu yusum paspot.

Wan pat blong Priampol blong mama loa blong Vanuatu i talem se Vanuatu i stanap tru long ol melanesian valiu mo plante valiu ia i stap distroem tete olsem ol tabu eria raon long ol aelan folem divelopmen.